«Astana beıbitshilik deklaratsııasy 2025» BUU Bas Assambleıasy 80-sessııasynyń resmı qujaty retinde taratylady
ASTANA. KAZINFORM – Álemdik jáne dástúrli dinder kóshbasshylary VIII Ceziniń qatysýshylar qabyldaǵan «Astana beıbitshilik deklaratsııasy 2025» BUU Bas Assambleıasy 80-sessııasynyń resmı qujaty retinde taratylady.
- Biz beıbitshilikke, áleýmettik turaqtylyqqa jáne jahandyq yntymaqtastyqqa qol jetkizýge baǵyttalǵan kúsh-jigerdiń mańyzdy quraly bolyp tabylatyn dinaralyq jáne mádenıetaralyq dıalogty tereńdetýge degen adaldyǵymyzdy bildiremiz. Qaqtyǵystar men geosaıası qarama-qaıshylyqtardyń kúsheıýi jaǵdaıynda, dıalog adamzattyń ómir súrýiniń negizi bolyp tabylatyn beıbitshilik pen damýǵa jol ashady. Biz ulttyq úkimetterdi, halyqaralyq uıymdardy, dinı lıderlerdi, saıasatkerlerdi, sarapshylardy, ÚEU, BAQ ókilderin jáne barlyq izgi nıetti adamdardy adamzat birliginiń negizi retinde mádenıetaralyq jáne dinaralyq dıalogty belsendi túrde ilgeriletýge, tózimdilikti, adam quqyqtaryn qurmetteýdi, ınklıýzıvtilikti jáne beıbit qatar ómir súrýdi dáripteýge, halyqtar men memleketter arasyndaǵy beıbitshilik pen ózara túsinistikti nyǵaıtý úshin óshpendilik pen zorlyq-zombylyqtan bas tartýǵa shaqyramyz, - delingen qujatta.
Sondaı-aq sezd qatysýshylary jańa tehnologııalardy, sonyń ishinde tsıfrlyq tehnologııalardy, jasandy ıntellekt pen bıoınjenerııany jaýapty túrde paıdalanýǵa shaqyrady. Jasandy ıntellektti kemsitý, óshpendilik nemese adam qadir-qasıetine nuqsan keltirý maqsatynda qoldanýǵa jol berilmeýi kerektigin atap ótedi. Adam quqyqtary men etıka qaǵıdattaryna súıene otyryp jasalǵan jasandy ıntellektti paıdalaný jónindegi halyqaralyq normalardy ázirleýdiń qajettiligin atap kórsetedi. Jasandy ıntellektti damytýdaǵy progresske qaramastan, shynaıy janashyrlyq pen súıispenshilik tanytý tek adamǵa ǵana tán qabilet ekendigin jáne osy qasıetterge baýlý adamzattyń gýmanıstik ári rýhanı-adamgershilik turǵydan damýynyń arqaýyna aınalýǵa tıis ekenin málimdeıdi.
- Biz Qazaqstan Prezıdenti Qasym-Jomart Toqaevtyń kelispeýshilikter men qaqtyǵystardy eńserýge, halyqtar arasyndaǵy senimdi nyǵaıtýǵa jáne beıbitshilik pen ádildik murattaryn ornyqtyrýǵa umtylatyndardyń kúsh-jigerin biriktirý maqsatynda beıbitshilik jolyndaǵy jańa jahandyq qozǵalys qurý jónindegi úndeýin qoldaımyz. Biz basqa jahandyq jáne óńirlik alańdarmen serikteste otyryp, beıbitshilik pen kelisim mádenıetin ilgeriletýdiń tıimdi joldaryn izdeý úshin beıbitshilik jolyndaǵy jahandyq qozǵalystyń maqsattaryn ilgeriletý jónindegi halyqaralyq dıalogty jandandyrýǵa jáne halyqaralyq is-sharalar legin – dóńgelek ústelder, konferentsııalar men saıd-ıventter uıymdastyrýǵa nıettimiz, - delingen deklaratsııada.
Búgin elordadaǵy Táýelsizdik saraıynda Prezıdent Qasym-Jomart Toqaevtyń qatysýymen Álemdik jáne dástúrli dinder kóshbasshylary VIII Ceziniń deklaratsııasy qabyldanǵan edi.
Búkil álemdegi bılik ókilderine, saıası jáne dinı lıderlerge, halyqaralyq jáne óńirlik uıymdarǵa, azamattyq qoǵam ınstıtýttaryna, sondaı-aq dinı birlestikter men jetekshi sarapshylarǵa joldanatyn deklaratsııa mátinimen myna siltemege ótip tanys bola alasyzdar.