«Astana - beıbitshilik pen bolashaq qalasy» kórmesi ashylady
ASTANA. 12 qarasha. QazAqparat - Qazirgi zaman óneri murajaıynda «Astana - beıbitshilik pen bolashaq qalasy» kórkem kórmesi ashylady. Bul týraly Astana qalasynyń resmı saıtyna murajaıdyń ǵylymı-aǵartý tobynyń jetekshisi Dámetken Bekova málim etti.
«Astana - beıbitshilik pen bolashaq qalasy ekspozıtsııasy» elimizdiń bas qalasynyń túrki áleminiń astanasy dep jarııalanýyna arnalyp otyr. Munda murajaı qory men sýretshilerdiń jeke jıyntyqtarynan 38 jumys usynylatyn bolady. Kórme Astana qalasy Mádenıet basqarmasy men Sýretshiler odaǵy qalalyq fılıalynyń qoldaýymen uıymdastyrylyp otyr», - dedi Dámetken Bekova.
Kórmege jas qylqalam sheberlerimen qatar elordanyń Alekseı Terehov, Larısa Janpeıisova, Kamıl Mýllashev sııaqty tanymal sýretshileri de qatysýda. Onda «Daladaǵy saǵym», «Jańbyrdan soń», «Qonaqjaı aýdandar» týyndylaryn kórýge bolady. Sýretshiler polotnoǵa eńbek adamdary men qalanyń eń kórikti jerleri - Esil ózeniniń jaǵasyn, Prezıdent rezıdentsııasy Aqordany, gúlzarlar men záýlim úılerdi arqaý etken.
Kórme 14 qarashadan 3 jeltoqsanǵa deıin ótedi.
