Astana – Belgrad: Prezıdent Teleradıokesheni Serbııanyń jetekshi aqparat quraldarymen seriktes atandy

ASTANA. KAZINFORM – Astanada Serbııa Prezıdentiniń Qazaqstanǵa resmı sapary aıasynda Prezıdent Teleradıokesheni men Serbııanyń ortalyq buqaralyq aqparat quraldary arasynda yntymaqtastyq týraly memorandýmdarǵa qol qoıyldy.

Prezıdent TRK jańa seriktesteri retinde Serbııanyń RTS (Radio-televizija Srbije) memlekettik teleradıokompanııasy jáne eldiń iri aqparat agenttikteri — Tanjug pen Telegraf qosyldy.

Qol qoıylǵan qujattar medıakontent óndirý men taratý baǵytynda birlesip jumys isteýge, mańyzdy oqıǵalardy jarııalaýǵa, sondaı-aq Qazaqstan men Serbııadaǵy jańalyqtardy aýdıtorııaǵa keńinen habarlaýǵa múmkindik beredi. Budan bólek, bekitilgen memorandýmdar taraptarǵa ozyq tehnologııalar men medıa óndirisindegi biregeı ádistemelerdi engizý tájirıbesimen almasýǵa jol ashady.

Eýropalyq BAQ-pen yntymaqtastyqty keńeıtý – Prezıdent Teleradıokesheniniń mádenı-gýmanıtarlyq yqpaldastyqty tereńdetý jáne Eýrazııa keńistigine ortaq aqparattyq alań qalyptastyrý strategııasynyń bir bóligi sanalady.

Aıta keteıik, QR Prezıdentiniń Teleradıokesheni – Qazaqstandaǵy tolyq tsıkldi qyzmet kórsetetin eń iri medıakompanııa. Onyń quramyna respýblıkalyq Jibek Joly telearnasy jáne osy attas radıo, halyqaralyq Silk Way, Silk Way Cinema, Silk Way Prime telearnalary, «Kazınform» halyqaralyq aqparat agenttigi jáne Derekti kıno ortalyǵy kiredi.

RTS (Radio-televizija Srbije) – 1958 jyly qurylǵan Serbııanyń memlekettik teleradıo habar taratatyn kompanııasy. RTS quramyna on telearna, radıo jáne jeke kitap baspasy kiredi. Kompanııanyń Máskeý, London, Brıýssel, Parıj, Rım, Vena, Vashıngton, Chıkago jáne Tokıoda menshikti tilshileri bar.

Tanjug – 1992 jyldan beri jumys isteıtin eń iri jańalyqtar agenttigi. Agenttik ornyqty tilshiler jelisine ıe jáne Serbııada, Ońtústik-Shyǵys Eýropa óńirinde jáne álemde saıasat, ekonomıka, mádenıet jáne sport salalaryndaǵy ózekti oqıǵalardy jarııalaıdy.

Telegraf – Serbııanyń jetekshi ári eń tehnologııalyq aqparat agenttigi. Olar álemdik ózekti jańalyqtar men eksklıýzıv avtorlyq materıaldardy jarııalaıdy. Dástúrli jańalyqtar lentasynan bólek, Telegraf jańalyqtary óz telestýdııasynan efırge shyǵady.

Osyǵan deıin Qazaqstan men Serbııa arasynda birqatar strategııalyq salalar boıynsha birqatar memorandýmǵa qol qoıylǵany týraly jazdyq.