Astana bazarlarynda qulpynaıdan nıtrattar tabyldy
ASTANA. QazAqparat - Elordadaǵy bazarlarda saýdalanyp júrgen qulpynaı men shalǵamnan nıtrattar tabyldy. Bul týraly Astana qalasy Tutynýshylardyń quqyqtaryn qorǵaý departamentiniń basshysy Nurlybek Asylbekov málim etti.
«Qazirgi kezde taldaý jasap, bazarlardaǵy nıtrattyq ónimderdi anyqtaý sharalaryn júrgizýdemiz. Osy saýda oryndarynda jumys isteıtin zerthanalarmen ózara is-qımyldardy iske asyrýdamyz. Atap aıtqanda, nıtrattar qulpynaı men shalǵamda baıqaldy. Sondyqtan da tıisti sharalar qabyldanyp jatyr»,-dedi Asylbekov tilshiler saýalyna jaýap berý kezinde.
Sonymen qatar ol departament qoǵamdyq tamaqtaný nysandaryna reıdter ótkizip turatyndyǵyn jetkizdi.
«Biz kópshilik tamaqtanatyn nysandarǵa monıtorıng júrgizýdemiz, ıaǵnı sanıtarlyq talaptarǵa sáıkes bolýy úshin meıramhanalar, dámhanalardy jáne qonaq úılerdi qamtýdamyz. Bul sharalar birinshi kezekte qala meımandary men turǵyndarynyń qaýipsizdigi úshin qajet. Ol úshin búginde atalǵan sýbektilermen tıisti jumystar atqarylýda. Osy oraıda personaldy qadaǵalaý, azyq-túlik ónimderin baqylaý sharalary eskerilgen»,-dedi ol.
Sóz sońynda N. Asylbekov 2015 jyldyń 5 aıynda sanıtarlyq-epıdemıologııalyq qyzmet túrli zań buzýshylyqtar úshin jalpy 8 mln. teńgege jýyq somaǵa 200-den astam aıyppul salǵanyn atap ótti.
