Astana bazarlarynda «Ár turǵynǵa qaýipsiz azyq-túlik» aktsııasy ótkizilýde
ASTANA. QazAqparat - Elordada «Astanalyq bazar», «Shapaǵat», «Ásem» bazarlarynda úsh kún boıy «Ár turǵynǵa qaýipsiz azyq-túlik» aktsııasy ótkiziledi.
Bul týraly Astana qalasynyń Tutynýshylardyń quqyǵyn qorǵaý departamentinen habarlady, dep jazady elorda ákimdiginiń resmı saıtynda. Aktsııanyń alǵashqy kúninde 278 taǵam óniminiń synamasy tekserildi, sonyń ishinde 210 synama jemis-jıdekter men kókónisterden nıtrattar qaldyǵyn, 69 synama taǵam ónimderiniń mıkrobıologııalyq lastanýyn anyqtaý maqsatynda tekserildi. Tekserýler qorytyndysy boıynsha barlyq ónimderdiń talaptarǵa sáıkes keletini jáne qoldanýǵa qaýipsiz ekeni naqtylandy. Sondaı-aq aktsııa barysynda 74 satyp alýshy departament qyzmetkerlerine ózderin mazalaǵan máseleler boıynsha suraqtar qoıdy. Olarǵa taýardy qalaı qaıtarý kerektigi, súttiń, shujyqtyń, irimshiktiń sapasyn qalaı anyqtaýǵa bolatyny týraly keńester berildi. Shara sońynda tutynýshylarǵa astan ýlanýdyń aldyn alý jáne tutynýshylardyń quqyǵyn túsindirý týraly kórneki quraldar men materıaldar taratyldy. Endi departament qyzmetkerleri aktsııany júıeli túrde, ásirese, jemis-jıdekter men baý-baqsha ónimderi kóbirek satylatyn kezeńderde mindetti túrde ótkizýdi josparlap otyr.
