Astana bazarlaryndaǵy et qanshalyqty qaýipsiz
ASTANA. KAZINFORM — Maýsym aıynda Aqmola oblysynda sibir jarasy tirkelip, etsiz as batpaıtyn aǵaıyndy biraz alańdatyp tastady. Kazinform tilshisi osy oraıda elorda bazarlaryn aralap, et saýdasy qalaı uıymdastyrylyp jatqanyn sholyp qaıtty.
«Kóktal» bazary
Munda et satatyn 28 núkte bar:
• 5 — qoı etin;
• 15 — sıyr etin;
• 8 — jylqy eti satady.
Bulardan bólek ettiń birneshe túrin satatyn eki úlken núkte taǵy bar.
— Et satatyn núkteler mal ıelerinen azdap qana, bir kúnde ótip ketetindeı mólshermen alady. Sondaı kúnbe-kún satqan et balǵyn bolyp turady, — deıdi bazar ákimshisi.
Et qabyldaý tańǵy saǵat 8.00-den 10.00-ge deıin jalǵasady. Negizinen etti Qostanaı, Soltústik Qazaqstan, Petropavl oblystarynan ákeledi. Al ár dúısenbi — sanıtarııalyq kún.
— Et bazarǵa túspeı turyp, sertıfıkattalyp, zerthana synaqtarynan ótedi. Jaramdy etke mór basylady. Bazarǵa sonda móri bar et qana jiberiledi, — deıdi bazar ákimshisi.
«Shapaǵat» saýda-oıyn-saýyq ortalyǵy
Munda sanıtarııalyq kún aıyna bir ret, aqyrǵy dúısenbi saıyn ótedi. Et qabyldaý saǵat 7.00-de bastalyp, 10.00-de aıaqtalady. Ónimdi Pavlodar, Petropavl, Kókshetaý, Shýchınsk qalalarynan ákeledi.
— Bizdiń bazarda shoshqa eti satylmaıdy. Et satatyn 80 núkte bar. Bárinde sıyr, qoı, jylqy eti satylady. Tek zerthanada tekserýden ótken etti ǵana alamyz, — deıdi bazar ákimshisi.
Saýda ortalyǵynyń menedjeri bizdiń kóz aldymyzda ǵımarat aýlasynda taýyq etin ashyq sórede satyp turǵan kásipkerge 20 myń teńge aıyppul saldy. Bul olqylyqty ekinshi ret qaıtalasa, 150 myń teńge aıyppul salatynyn da aıtty.
Basqa bazarlar she?
«Artem», «Álem», «Ásem», «Eýrazııa» bazarlarynda da saýda qalypty. Turyp qalǵan, ıistengen et kezdespedi. Satýshylar qolyna arnaıy qolǵap kıgen, saýda alańdary taza. Biraq bazar ákimshileri men menedjerleri saýda qalaı uıymdastyrylatynyn aıtýdan bas tartty.
Et saýdasyn kimder baqylaıdy?
Aýyl sharýashylyǵy mınıstrliginiń málimeti boıynsha, Astananyń ózinde ǵana veterınarlyq-sanıtarııalyq saraptama jasaıtyn zerthanasy bar 15 bazar jumys istep tur. Onyń bárinde memlekettik ınspektorlar kún saıyn ónimniń sanıtarııalyq talapqa sáıkes bolǵanyn qadaǵalaıdy.
Mal ıelerinen et satyp alǵan kezde veterınar mamandar birge júredi. Veterınarlyq anyqtama, mór bar ekenine kóz jetkizgennen keıin ǵana qabyldaýǵa ruqsat beredi. Aqparattyq júıeden maldyń tirkeý qujattaryn, tasymal qanshalyqty zańdy oryndalǵanyn da tekseredi.
Jyl basynan beri krımınaldyq polıtsııa ókilderi Astana bazarlarynda 3 ret reıd júrgizipti. Sonyń negizinde jalpy somasy 2,5 mln teńgege 53 ákimshilik qaýly toltyrylǵan. Degenmen aýrý maldyń etin satý faktisi tirkelmegen. Olqylyqtyń bári qujatty durys rásimdemeýmen baılanysty bolsa kerek.
Qala qaqpalaryndaǵy blokpostar
1-11 shilde aralyǵynda veterınar ınspektorlar Kókshetaý, Astrahan, Pavlodar, Qosshy, Qaraótkel trassalarynyń kire beristerinde ornatylǵan 6 blok-bekette jumys istegen. Et pen mal tıegen 130 kólik tekserilip, 491,5 myń teńgeniń 11 zań buzý faktisi tirkelgen. Zań boıynsha ondaı et birden tárkilenip, saraptama jasatý úshin zerthana jiberiledi. Saraptama qorytyndysy shyqqansha ol et arnaıy orynda saqtalady. Etten aqaý tabylsa, qujaty durys bolmasa, ıesine aıyppul salynady.
Buǵan deıin Aqmola oblysynyń bas veterınary Sibir jarasynyń órshýine baılanysty jazalanǵanyn jazǵan edik.