Astana baılanys aıasynan tys jerde: Aqtóbedegi tsıfrlyq portal isten shyqty
AQTÓBE. KAZINFORM – Qaladaǵy saıabaqta turǵan tsıfrlyq portal alynyp tastalady. Іsten shyqqan soń eshkimge kerek bolmaı qaldy.
Aqtóbelik kásipker Trıatlon saıabaǵyna tsıfrlyq portal salyp berdi. 2021 jyly resmı túrde ashylyp, oǵan sol kezde oblys ákimi bolǵan Ońdasyn Orazalın men qala ákimi bolǵan Ashat Shaharov qatysty.
Alaıda arada 4 jyl ótkende portal qırap, jaramsyz kúıge tústi. Bul dúnıe qazir kásipkerge de, jergilikti ákimdikke de qajet emes. Sóıtip alyp tastaýǵa sheshim qabyldandy.
– 2021 jyldyń qarasha aıynda naqty ýaqyt rejıminde qosylyp turatyn tsıfrlyq portal qoıyldy. Ol portal tek Astana qalasyn kórsetetin boldy. Muny kásipker Gennadıı Zobenko demeýshilik esebinen qoıyp berdi. Tsıfrlyq tehnolonııanyń jumys isteýin qamtamasyz etip, kútip ustaýdy mindetine aldy. Sóıtip qalalyq turǵyn úı-kommýnaldyq sharýalyq bóliminiń balansyna tapsyrǵan joq. Kásipker mindettemesin oryndamady. Al qazirgi ýaqytta portal jumys istemeı tur. Ony jóndeý úshin kásipker portaldy turǵyn úı-kommýnaldyq sharýashylyq bólimine ótkizý, bıýdjetten qarjy qarastyryp, jóndeý ornyn tabý kerek. Kútip ustaýǵa da qyrýar qarajat bólinýi qajet. Bul bıýdjet úshin tıimsiz. Sondyqtan qalalyq turǵyn úı-kommýnaldyq sharýashylyq bólimi portaldy demontajdaý týraly sheshim qabyldady, - dep habarlady Aqtóbe qalasy ákiminiń baspasóz hatshysy Aıgúl Baımenova.
Aıta keteıik, Aqtóbede byltyrǵy sý tasqyny kezinde buzylǵan, jaramsyz bolǵan úıler bıyl súrilýi tıis. Áli kúnge deıin merdiger anyqtalmaı jatyr.