«Astana» basketbol komandasynyń tanystyrylymy ótti
ASTANA. 29 qyrkúıek. QazAqparat - Búgin elordada «Astana» basketbol klýbynyń jańa maýsymynyń tanystyrylymy ótti, dep habarlady Sports.kz.
«Samuryq-Qazyna» ulttyq ál-aýqat qorynyń qoldaýymen uıymdastyrylǵan, bıyl «Astana» Prezıdenttik kásibı sport klýbynyń qurylymyna kirgen komanda óziniń tarıhyndaǵy úshinshi basketbol jylyna kirisýge ázirlenýde.
Kezdesýge kóptegen jankúıerler, sportshylar, jýrnalıster qatysty. Baspasóz máslıhatynda elordalyq klýb ókilderi jańa maýsymda VTB Biryńǵaı Lıgasynda jáne basqa týrnırlerde astanalyq komandadan jankúıerler ne kúte alatyny týraly áńgimeledi.
«Samuryq-Qazyna» qory tabysty sporttyq jobalardy árdaıym da qoldap otyratyn bolady. Bıylǵy jyly «Astana» basketbol komandasy «Astana» Prezıdenttik kásibı sport klýbynyń quramyna kirdi, ende taıaýdaǵy bolashaqta bul joba da bizdiń velokomanda sııaqty Qazaqstannyń brendi bolady dep senemin», - dedi «Samuryq-Qazyna» UÁQ basqarýshy dırektory Darhan Káletaev.
«Biz 14 qazanda jańa maýsymdy ashamyz. Aldaǵy maýsym týraly aıtar bolsam, bizdiń komanda úshin jerebe tartý jaqsy ótti. Bıylǵy jyly bizdiń qarsylastarymyz alty jańa komanda bolady, olar Qazaqstanda áli bolǵan joq. Olardyń arasynda máselen, TsSKA, VEF, «Letývos Rıtas», «Volograd» komandalary bar». Bıylǵy jyly biz «Astana» Prezıdenttik kásibı sport klýbynyń quramyna kirdik, ótken maýsymda VTB Biryńǵaı Lıgasynyń pleı-off qataryna óttik, endi biz budan da joǵary mejeni kózdeımiz», - dedi «Astana» basketbol klýbynyń bas dırektory Valerıı Tıhonenko.
Komandanyń bas jattyqtyrýshysy Matteo Bonıchılollı «aldymyzda jumystar jeterlik, bizdi kúrdeli maýsym kútip tur. Men bir nársege senimdimin - ol: bizdiń qazirgi quramymyz sońǵy jyldardaǵy eń kúshti dep aıta alamyn. Biz Qazaqstandy jańa jeńisterimizben qýantatyn bolamyz», -degen pikirin bildirdi.
