«Astana» basketbol komandasy WASL lıgasyndaǵy ekinshi jeńisine qol jetkizdi

ASTANA. KAZINFORM – Basketboldan «Astana» komandasy kezekti jeńisin toılady. 

Prosports.kz sporttyq portalynyń málimetinshe, Azııanyń WASL lıgasy aıasynda elordalyq «Velotrek» arenasynda ótken matchta qazaqstandyq klýb sırııalyq «Al Vahda» komandasynan basym tústi. Qorytyndy esep – 88:64.

Osy nátıjeden keıin «Astana» «A» tobynyń týrnırlik kestesinde 2-orynǵa jaıǵasty. Kelesi kezdesý elordada ótedi. 15 qańtarda astanalyq ujym óz alańynda ırandyq «Shahrdarı Gorgan» komandasyn qabyldaıdy.

Aıta keteıik, bul – «Astana» úshin WASL aıasyndaǵy úshinshi maýsym. 2023 jyly komanda qola júldege qol jetkizse, ótken maýsymda toptyq kezeńnen shyǵa almady. Al bıylǵy maýsymda elordalyq klýb Reseıdiń VTB Biryńǵaı lıgasyna qatysýdan úzilis alyp, bar kúshin Azııa arenasyndaǵy oıyndarǵa baǵyttap otyr.

Eske sala ketsek, budan buryn Jaqsylyq Úshkempirov atyndaǵy jekpe-jek saraıynda erler arasynda voleıboldan Qazaqstan kýbogynyń oıyndary máresine jetkenin jazǵan edik. Atalǵan týrnırde «Jetisý» komandasy top jardy.