«Astana» basketbol klýbynyń jańa bapkeri Eýropanyń úzdik mamany bolýy yqtımal

Alaıda, búgin elordada ótkizgen baspasóz máslıhaty kezinde klýb basshysy, KSRO-nyń sportqa eńbegi sińgen sheberi Valerıı Tıhonenko Bas jattyqtyrýshynyń atyn atap, túsin tústemeýdi jón kórdi.

Tek onyń Eýropa qurlyǵynyń bedeldi, tájirıbesi mol bapkeri bolýy ábden múmkin degen ıshara tanytty. «Áli eshtene anyqtalǵan joq. Biz bas demeýshige zor alǵys bildiremiz, jańa klýb, jańa shyǵyndar, úlken kelisimsharttar jasalady. Sonymen qatar jańa Bas bapkerdi de izdestirip jatyrmyz, biz onyń top úzdiktiń qataryndaǵy, álemdik deńgeıde aty tanymal, áleýeti zor bolǵanyn qalaımyz. Qaıtqan kúnde de biz bapkerlikke basketboldy retke keltire alatyn, oǵan kómegi tıer adamdy ákelýge tıispiz. Tuspaldap aıtaıyn - ol Eýropadan»,-dedi V. Tıhonenko.

Búginde «Astana Jolbarystarynyń» bapkeri bolyp tabylatyn Vıtalıı Strebkov jańa klýbtyń jattyqtyrýshylarynyń biri bolyp qala beredi. Aıta keteıik, «Samuryq-Qazyna» ÁAQ klýbpen bas demeýshilik týraly úsh jyldyq kelisimshartqa otyrdy. Ol boıynsha, klýbqa bir jylǵa 5 mln. AQSh dollary bólinbek.

«Astana» BK-nyń negizin elimizdiń jetekshi klýby «Astana Tigers» oıynshylary quraıtyndyǵy jóninde buryn BAQ habarlaǵan bolatyn. «Eger biz Lıgada jaqsy oıyn kórsetkimiz kelse, onyń quramyn kúsheıtý kerektigimiz anyq. Biz VTB-ǵa birden bolmasa da, jeńý úshin endik»,-dep atap kórsetti klýb basshysy.

«Bas bapker osynda kelisimen «Astana jolbarystary» sapyndaǵy oıynshylardyń qaısysy irikteý talaptaryna saı keletindikterin áli anyqtaı jatar. Sonymen qatar kem degende 5 sheteldik legıoner tartylady. Reglament boıynsha olar - 2 amerıkalyq, 3 eýropalyq bolady»,-dedi V. Tıhonenko.

Onyń atap ótkenindeı, komanda qataryna shetel klýbtarynda oınap júrgen qazaqstandyqtar da alynýy múmkin. «Sońǵy sóz mende bolady. Men olarǵa qatysty óz minezdememdi keıin mindetti túrde jetkizemin»,-deıdi ol.

Komandanyń aldaǵy mindetterine toqtalǵan Bas dırektor, «VTB sońǵy jyldary úlken qarqynmen damyp kele jatqan lıgalardyń biri, onyń quramyna Reseıdiń úzdik komandalarynyń biri enedi, sondaı-aq onda Lıtva, Estonııa, Latvııa, Polsha jáne Fınlıandııanyń jetekshi ujymdary óner kórsetedi. Degenmen biz «urýǵa arnalǵan» komanda bola almaımyz, biz laıyqty óner kórsetý, shama kelgenshe jeńiske jetý úshin barlyq jaǵdaıdy qamtamasyz etýimiz qajet»,-dedi V. Tıhonenko.

Klýb basshysy, baspasóz máslıhaty kezinde, sondaı-aq «Astana» BK Qazaqstan ulttyq chempıonatyna qatysatyndyǵy nemese qatyspaıtyndyǵy jónindegi ekiushty áńgimelerdiń basyn ashyp tastady. «Syrtqy lıgalarda óner kórsetip júrip, el birinshiligine qatyspaý degen qısynsyz nárse. Klýb aldyna ulttyq chempıonatta eń joǵary mindetter qoıylady, bul jerde eshqandaı suraq týyndamaýy tıis»,-deıdi Bas dırektor.

Reseı astanasynda bolǵan VTB Biryńǵaı Lıgasy Keńesiniń otyrysynda onyń quramyna «Astana» klýbyn alý jóninde sheshim 28 naýryzda qabyldanǵan bolatyn. Qazirdiń ózinde VTB óziniń resmı saıtyna Lıganyń jańa qatysýshysy «Astana» komandasy týraly aqparatty ornalastyryp qoıǵan. Keńes otyrysynda VTB Biryńǵaı Lıgasynyń jańa prezıdenti bolyp saılanǵan RF vıtse-premeri Sergeı Ivanov 2011/12 jylǵy maýsymǵa «Lokomotıv-Kýban» (Krasnodar), «Spartak» (Sankt-Peterbýrg), chehııalyq «Nımbýrk» jáne qazaqstandyq «Astana» alǵash ret qatysady dep málimdedi. Jańa maýsymǵa qatysýshy ujymdar sany 16-ǵa deıin kóbeıtilgen. Osylaısha, alǵashqy kezeńde qatysýshylar eki topqa bólinip, 2 aınalymnan turatyn týrnır ótkizedi. Top jeńimpazdary «Tórteýdiń fınalyna» tikeleı joldama alady, qalǵan eki oryn úshin óz toptarynda 2-4 oryn alǵan komandalar pleı-off synynda talasady (eki jeńiske deıingi 1/8 jáne 1/4 fınaldyq serııa). Jerebe tartý rásimi Eýrolıgadaǵy jerebeleýden keıin, shamamen maýsym aıyna josparlanǵan. Onyń aıtýynsha, VTB lıgasyna qatysýǵa kóptegen komandalardan ótinishter túsken. Іrikteý qatań júrgizildi: ınfraqurylymnyń sáıkestigi, bıýdjet kepildigi eskerildi, 7 myńnan toǵyz myńǵa deıingi otyrý oryndary bar sporttyq arenanyń mindetti túrde bolýy jáne oıyndardyń telekórsetilimin uıymdastyrýǵa múmkindik bolýy qajet. Elordalyq klýb 9 myń kórermendi syıǵyza alatyn respýblıkalyq velotrektiń zalynda oınaıdy.