«Astana» basketbol klýbyna ataqty ıtalıandyq bapker keldi

Búgin elordada ótken baspasóz máslıhaty kezinde resmı túrde shartqa qol qoıyldy. Keıin klýb basshysy, KSRO-nyń sportqa eńbegi sińgen sheberi Valerıı Tıhonenko Bas jattyqtyrýshyny jýrnalısterge tanstyrdy.

V.Tıhonenkonyń atap ótkenindeı, bapkerdi tańdaý barysynda klýb basshylyǵy onyń jaı ǵana komandany jattyqtyrýmen aınalysyp júretin adam bolǵanyn ǵana emes, top úzdikterdiń qataryndaǵy, álemdik deńgeıde aty tanymal, áleýeti zor tulǵa bolǵanyn qalaǵan.

«Eger Matteo Bonıchıolı týraly sóz qozǵaıtyn bolsaq, 2008 jyly ol Avelıno komandasynyń jattyqtyrýshysy retinde Italııa Kýbogin jeńip aldy. Italııa lıgasy álemniń eń myqty lıgalarynyń biri. 2008 jyly «Jyl bapkeri» ataǵyn alǵan bolatyn. 2009 jyly Bolonııamen birge Eýro chellendjer týrnırin jeńgen. Al 2010 jyly Rım komandasymen birge Eýro lıganyń 16 úzdikteriniń qataryna kirdi. Bul óte úlken nátıje, asa joǵary nátıje»,-dedi V. Tıhonenko.

«Astana» basketbol klýbyna shaqyrtylýym men úshin uly synaq. Óıtkeni bastapqy negizinen óte myqty komanda qurý mindeti tur. Qazaqstandyq jas basketbolshylarmen alda olardyń sheberlikterin jetildirý baǵytynda úlken jumystar kútip tur»,-dedi BK-nyń jańa bas bapkeri M. Bonıchıolı.

Aıta keteıik, «Samuryq-Qazyna» ÁAQ klýbpen bas demeýshilik týraly úsh jyldyq kelisimshartqa otyrdy. Ol boıynsha, klýbqa bir jylǵa 5 mln. AQSh dollary bólinbek. «Astana» BK-nyń negizin elimizdiń jetekshi klýby «Astana Tigers» oıynshylary quraıtyndyǵy jóninde buryn BAQ habarlaǵan bolatyn.

Sonymen qatar klýb basshylyǵy kem degende 5 sheteldik legıoner satyp alýdy josparlaýda. Reglament boıynsha olar - 2 amerıkalyq, 3 eýropalyq bolmaq. Komanda qataryna shetel klýbtarynda oınap júrgen qazaqstandyqtar da alynýy múmkin.

Jańa maýsymda «Astana» klýby VTB lıgasynda oınaı bastaıdy. VTB sońǵy jyldary úlken qarqynmen damyp kele jatqan lıgalardyń biri, onyń quramyna Reseıdiń úzdik komandalary enedi, sondaı-aq Lıtva, Estonııa, Latvııa, Polsha jáne Fınlıandııanyń jetekshi ujymdary óner kórsetedi.