«Astana» basketbol klýbyna amerıkalyq qorǵaýshy qosyldy
ASTANA. QazAqparat - «Astana» basketbol klýbynyń quramyna 29 jastaǵy amerıkalyq basketbolshy, qorǵaýshy Malkolm Grant qosyldy, dep habarlaıdy QazAqparat «Astana» Prezıdenttik klýbynyń baspasóz qyzmetine silteme jasap.
Malkolm Grant Brýklınde dúnıege kelgen, basketbolmen mektepte aınalysa bastaǵan, keıin Florıdanyń úzdik ýnıversıtetteriniń biri - basketbol komandasy dúrkirep turǵan «Maıamı Ýnıversıtetine» túsip, sportshy sol komanda quramynda óner kórsetti.
Grant kásipqoı karerasyn 2012 jyly bastaǵan. Sportshynyń alǵashqy klýby Kıprdegi «APOEL» boldy. Keıin ol Aýstralııaǵa kóship baryp, «Wollongong Hawks» komandasynyń atynan shyǵa bastady. 2014 jyly basketbolshy Kanadadaǵy «HalifaxRainmen» quramyna qosylsa, shamaly ýaqyttan keıin «LF Basket Norrbotten» degen shved klýbyna aýysqan. 2015 - 2016 jylǵy maýsym aralyǵyna «Mississauga Power» (Kanada) jáne «IslandStorm» (Islandııa) komandalarynyń atynan óner kórsetken.
Ótken maýsymda basketbolshy slovenııalyq «Tajfun» quramynda 36 oıyn ótkizip, ortasha eseppen 11,4 upaı jınap otyrǵan.
Al osy maýsymda Malkolm Grant lıtvalyq «Nevėžis» komandasynyń atynan óner kórsetip, Lıtva chempıonatynda 10 oıyn ótkizdi, árbir oıynda ortasha eseppen 14 upaıdan jınaǵan. Malkolm Granttyń óte mergen ekenin atap ótý qajet, sonymen qatar, ol úsh upaılyq laqtyrýlarda óte sátti - 50 %.
«Basketbol klýbynyń bapkerler shtabymen birigip, komanda quramyn osylaı kúsheıtýdi uıǵardyq. Maýsymnyń basynan beri «Astananyń» kestesi óte tyǵyz boldy. Esterińizde bolsa, qyrkúıekte komanda Azııa Chempıondary Kýbogyna qatysyp, bul chempıonatta Qazaqstannyń alǵashqy qola medalin jeńip aldy. Alaıda Qytaıda «Astana» quramynda alty legıonerdiń ekeýi ǵana oıynǵa tartyldy, bul jaǵdaı komanda oıynyna áser etti», dedi «Astana» Prezıdenttik klýbynyń atqarýshy dırektory Amanbek Kýlchıkov.
Ol komanda quramyn kúsheıtý týraly sheshimin túsindirip berdi.
Munymen qatar, «Astana» basketbolshylary ulttyq quramanyń negizgi bóligi ekenin bilesizder. VTB Lıgasyndaǵy matchtarǵa qatar daıyndala otyryp, qazaqstandyq sportshylarymyz Álem chempıonatyndaǵy irikteý matchtaryna da daıyndyq júrgizdi. Bir apta buryn ǵana Katar men Irakqa qarsy eki oıyn ótkizip, eki matchtyń qorytyndysy boıynsha jeńiske jettik. Biraq munda da komanda quramyna qatysty másele shyqty - qazaqstandyq jigitter ulttyq qurama atynan shyqqanda legıonerler demaldy. Bul, árıne, komandadaǵy jalpy túsinisip oınaýǵa áser etedi, osylaısha bul faktor oıyn nátıjelerine áser etedi. Bıyl VTB Lıgasyndaǵy birinshi matchtar «Astana» úshin kúrdeli boldy - syrt alańda birneshe oıyn ótkizdik. Sondyqtan qazir, chempıonat qyzyp turǵanda «Astana» basketbol klýby kúsheıýi qajet», - dedi ol.
Aıta keterligi, «Astana» Prezıdenttik klýby QR Prezıdenti N.Nazarbaevtyń bastamasymen qurylǵan jáne «Astana» ulttyq brendin halyqaralyq sport arenasynda tanytyp júr. «Astana» brendiniń aıasynda qazaqstandyq úzdik sport jobalary iske asyrylyp jatyr - «Astana» kásipqoı velokomandasy, «Astana» fýtbol klýby, «Barys» hokkeı klýby, «Astana» basketbol klýby, rallı-reıdten «Astana» komandasy jáne «Astana Arlans» boks klýby.
