«Astana» basketbol klýby VTB lıgasy aıasyndaǵy alǵashqy oıynda jeńiske jetti

Keshe, jeksenbi kúni ótken matchta elordalyq oıynshylar óziniń alańynda Lıtvanyń «Jalgırısin» qabyldap, 86:78 esebimen basym tústi.

Kezdesýdiń alǵashqy aınalymynda qonaqtardyń basymdylyǵy baıqaldy. Birinshi kezeńde «Jalgırıs» 15:11 esebimen alǵa sýyrylyp shyqty. Ekinshi jáne úshinshi kezeńder qarsylastardyń teń oıyn dárejesinde ótti. Jeńiske jetý úshin «Astanalyqtarǵa» kezdesýdiń sońǵy bóliginde 4 upaı kórsetkishimen alǵa shyǵý kerek boldy jáne qazaqstandyqtar ol mejeni asyra oryndady. Esep - 28:16. Osylaısha elordalyqtar VTB lıgasy aıasyndaǵy alǵashqy oıyndy jeńispen aıaqtady. «Astana» kelesi matchty 16 qazan kúni Rıganyń «VEF» komandasyna qarsy oınaıdy.

«Astana» BK-nyń bas jattyqtyrýshysy Matteo Bonıchıolıdiń aıtýynsha, bul jeńis jańadan jasaqtalǵan qazaqstandyq ujymǵa úlken senimdilik beredi.

«Biz oıynnyń sońǵy kezeńinde jeńiske jettik. Kezdesýde bastan-aıaq, 40 mınýt boıy joǵary belsendilik tanytýǵa múmkindik bergen komandanyń fızıkalyq daıarlyǵy syr bergen joq. Bul kelesi joly rıgalyq VEF komandasymen oınaıtyn bizdiń oıynshylarymyzǵa, sóz joq, úlken senimdilik bermek», - dedi ol match sońyndaǵy baspasóz máslıhatynda.

Aıta keteıik, VTB lıgasyna «Astana» basketbol klýby kelip qosyldy. VTB sońǵy jyldary úlken qarqynmen damyp kele jatqan lıgalardyń biri, onyń quramyna Reseıdiń, sondaı-aq Lıtva, Estonııa, Latvııa, Polsha jáne Fınlıandııanyń jetekshi sport ujymdary óner kórsetedi.