«Astana» bas bapker S.Stoılovtyń jalaqysyn ulǵaıtyp, kelisimshart merzimin uzartpaq
ASTANA. QazAqparat - «Astana» fýtbol klýby bas bapker Stanımır Stoılovpen kelisimshart merzimin uzartýǵa nıetti. Gol.bg habarlaǵandaı, klýb demeýshileri basshylyq aldyna bolgarlyq jattyqtyrýshymen kelisimshartty uzartýdy talap etken. Basylym aqparatyna súıensek, klýb Stoılovtyń jalaqysyn ulǵaıtady. Qazir onyń jyldyq tabysy 700 000 dollar bolsa, endi ol mıllıonǵa jetti.
Stoılovtyń «Astanamen» kelisimsharty maýsym sońynda aıaqtalady. Oǵan Qytaı men Katar klýbtarynan jaqsy usynystar túskeni habarlandy. Sportal.bg aqparatynsha, qytaılyq «Beıtszın Goan» Stoılovqa eki jyldyq kelisimshartqa turýdy usyndy. Oǵan sáıkes bapkerdiń tabysy jylyna 5 mıllıon dollar bolmaq.
Stoılov bolsa, bolashaqtaǵy josparyn ázirge anyqtamaǵanyn aıtty. «Qytaı men Katar klýbtary bapkerlerdi úlken qarajatpen qyzyqtyrady. Mende eki jol bar: osy komandalardyń birin nemese fýtboldy tańdaý. Katar nemese Qytaıda naǵyz fýtbol bar dep oılamaımyn. Meniń jumysymda aqsha eń mańyzdy faktor bolǵan emes. Men únemi jaqsy jetistikterge qol jetkizý úshin aıanbaı eńbektenetin klýbtarda jumys jasaýdy qalaımyn», - dedi Stoılov. Ol maýsymdaǵy sońǵy matchten keıin oılanatynyn jetkizdi, dep habarlady vesti.kz.
