Astana barlyq qazaqstandyqqa ortaq – Jeńis Qasymbek kóshi-qondy shekteý týraly

Astana qalasynyń ákimi Jeńis Qasymbek ózge óńirlerden elordaǵa kóshýge shekteý qoıý bastamasy týraly pikirin bildirdi, dep habarlaıdy Kazinform.

«Qazaqstan – ýnıtar memleket. Biz mundaı suraqtardy qoıa almaımyz. Elorda barlyq qazaqstandyqqa ortaq jáne munda báriniń kelýine quqyǵy bar. Jalǵyz jaýap osy bolýy múmkin. Ekinshi bir másele – elorda ınfraqurylymynyń osyndaı kóshi-qonǵa daıyndyǵy. Shynynda da, kóshi-qon qarqynynan artta qalýshylyq bar, ásirese kommýnaldyq-ınjenerlik jáne áleýmettik ınfraqurylymda baıqalady. Sondyqtan qazir tıisti sharalar qabyldanýda. Joǵaryda aıtylǵandaı, kóptegen mektepter, medıtsınalyq nysandar, balalarǵa arnalǵan mektepke deıingi bilim berý nysandarynyń qurylysy qarqyndy júrýde», - dep túsindirdi ákim Ortalyq kommýnıkatsııalar qyzmetinde.

Astana ákimi basqa óńirlerde jalaqysy joǵary jumys oryndary kóp ashylsa, kóshi-qon da ózgeretinin jetkizdi.

«Jyl saıyn qalanyń jańa turǵyndary 60-70 myń adamǵa kóbeıse, onyń 35 myńy – tabıǵı ósim. Eger 6-7 jyl buryn qalada 25 myń bala dúnıege kelse, bıyl 33 myńnan astam bala týǵan. Tipti 35 myńǵa deıin ósedi dep boljap otyrmyz. Astana – elimizdegi eń jas qalalardyń biri. Halyqtyń ortasha jasy shamamen 30-da», - dep tolyqtyrdy qala basshysy.