Astana bankiniń burynǵy aktsıoneri Oljas Toqtarovqa syrttaı sot úkimi shyqty
ASTANA. KAZINFORM – «Astana banki» AQ dırektorlar keńesiniń burynǵy tóraǵasy jáne majorıtarlyq aktsıoneri Oljas Toqtarov 10 jylǵa bas bostandyǵynan aıyryldy jáne odan 14 mıllıard teńgeden asatyn múlik tárkilendi. Bul týraly Sybaılas jemqorlyqqa qarsy qyzmettiń resmı ókili Danııar Bıgaıdarov aıtty.
Onyń aıtýynsha, bıylǵy Sybaılas jemqorlyqqa qarsy qyzmettiń qylmystyq isteri sheńberinde memleketke keltirilgen zalaldy óteı otyryp, birqatar sot sheshimi ótti. Onyń ishinde bıylǵy 22 sáýirde Astana qalasynyń qylmystyq ister jónindegi aýdanaralyq soty «Astana banki» AQ burynǵy top-menedjmentine jáne qyzmetkerlerine qatysty aıyptaý úkimi jarııalandy.
– Sot «Astana banki» AQ dırektorlar keńesiniń burynǵy tóraǵasy jáne majorıtarlyq aktsıoneri Toqtarovqa agenttik qyzmet kórsetý jáne bankrottyqqa deıingi kezeńge Almaty qalasyndaǵy bıznes-ortalyq baqylaýyndaǵy kompanııalarynyń paıdasyna zańsyz ıelikten shyǵarý túrindegi bank qarajatyn jymqyrǵany úshin kináli dep tanyldy. Toqtarov jalpy somasy 14 mıllıard teńgeden asatyn turǵyn úı, ákimshilik jáne óndiristik nysandar, qurylystar, jer ýchaskeleri, baǵaly qaǵazdar men krıptovalıýtalar túrindegi múlki tárkilenip, 10 jylǵa bas bostandyǵynan aıyryldy, − dedi D. Bıgaıdarov Sybaılas jemqorlyqqa qarsy qyzmette ótken brıfıngide.
Sondaı-aq onyń qaramaǵyndaǵy Astana banki AQ fılıal bóliminiń burynǵy basshylary men menedjerleri kináli dep tanyldy. Qylmystyq qýdalý organdarymen jáne sotpen yntymaqtastyqty, kináni moıyndaýdy jáne quqyqqa qaıshy áreketterdi ashýǵa járdemdesýdi eskere otyryp, sot olarǵa bas bostandyǵynan aıyrýmen baılanysty emes jaza taǵaıyndady.
Byltyrǵy qyrkúıek aıynda Antıkor kúdikti O.Toqtarovtyń Qazaqstan Respýblıkasynan tys jerde bolýyna jáne kelýden jaltarýyna baılanysty BAQ arqyly jaýap alýǵa shaqyrǵan edi.