«Astana bankiniń» menedjeri 160 mln teńgeni jymqyrǵan

NUR-SULTAN. QazAqparat - «Astana bankiniń» top-menedjeri 160 mln teńge qarajatty jymqyrǵan, dep habarlaıdy QazAqparat Qarjy mınıstrligi Qarjy monıtorıngi komıtetiniń baspasóz qyzmetine silteme jasap.

Atalǵan komıtettiń Ekonomıkalyq tergeý qyzmeti Ádilet mınıstrligine qarasty Respýblıkalyq quqyqtyq aqparat ortalyǵynyń shotynan 160 mln teńge qarajatty jymqyrý faktisin áshkereledi.

«Astana Banki» AQ-nyń basqarmasy tóraǵasynyń orynbasary E.J.Ývaleev 2012 jyldyń qazan aıynda Respýblıkalyq quqyqtyq aqparat ortalyǵynyń atynan tólem tapsyrmasyn qoldan jasap, urlanǵan qarajatty ózine baǵynyshty kompanııanyń shotyna aýdarǵan.

«Atalǵan qylmysty 6 jyl boıy jasyrýǵa sol banktiń menedjeri A.H.Jýndýgýlova kómektesip kelgen. Ol aı saıyn Respýblıkalyq quqyqtyq aqparat ortalyǵynyń býhgalterııasyna olardyń shoty boıynsha jalǵan málimetter berý arqyly memlekettik kásipornynda ózine qatysty jasalǵan alaıaqtyq týraly bilýine múmkinshilik bolmaǵan. Tergeý barysynda kúdiktiler óz kinálaryn moıyndap, kelgen shyǵyndar kólemin tolyqtaı ótedi. Tergeý barysynda kúdikti E.J.Ývaleev sottyń sanktsııasymen qamaýda boldy», - delingen habarlamada.

Nur-Sultan qalasynyń №2 Saryarqa aýdandyq sotynyń úkimimen E.J.Ývaleev pen A.H.Jýndýgýlova kináli retinde tanylyp, qylmystyq jaýapqa tartylǵan.