«Astana» banki úsh ÁKK-niń 900 mln teńge bıýdjet qarajatyn qaıtarmaǵan

ASTANA. QazAqparat – Bankrotqa ushyraǵan «Astana» banki úsh áleýmettik kásipkerlik korporatsııa depozıtke salǵan 906 mln teńge bıýdjet qarajatyn qaıtarmaǵan. Bul týraly Májilis depýtattarynyń saýalyna QR Sybaılas jemqorlyqqa qarsy is-qımyl agenttiginiń tóraǵasy Oljas Bektenovtiń jaýabynda aıtylǵan, dep habarlaıdy QazAqparat.

«Áleýmettik kásipkerlik korporatsııa teńgeriminde bar aktıvter, onyń ishinde ákimdikterden bıznespen birlesken jobalar jáne jarǵylyq kapıtaldaryn tolyqtyrý arqyly túsetin aktıvter úlestes tulǵalarǵa tómendetilgen quny (mundaı faktiler «Almaty», «Shymkent», «Soltústik», «Pavlodar», «Kaspıı», «Jetisý» jáne «Túrkistan» ÁKK-de bar) boıynsha satylady», - dep atap ótedi ol.

Agenttik tóraǵasynyń dereginshe, 2019-2021 jyldary ótkizý kezinde qunnyń tómendeýi, shamamen, 6 mlrd teńgeni quraǵan.

«Budan basqa, 2017-2018 jyldary «Pavlodar» (94 mln teńge), «Atyraý» (212 mln) jáne «Baıqońyr» (600 mln) ÁKK basshylyǵynyń «Astana banki» AQ-nyń depozıttik shottarynda jalpy somasy 906 mln teńge bıýdjet qarajatyn ornalastyrǵany anyqtaldy. Olar búgingi kúni banktiń bankrottyǵyna baılanysty qaıtarylmaǵan», - dedi Oljas Bektenov.

2018 jyldyń qarashasynda Almaty aýdanaralyq mamandandyrylǵan ekonomıkalyq soty «Astana banki» AQ-ny taratý týraly sheshim shyǵarǵan edi.