«Astana banki» boıynsha shaǵymdar qańtarda qaralady
ALMATY. QazAqparat - 27 jeltoqsan kúni Mamandandyrylǵan aýdanaralyq ekonomıkalyq sottyń «Astana Banki» AQ-ny májbúrli túrde taratý týraly sheshimi alty zańdy tulǵa jáne úsh jeke tulǵadan sotqa apellıatsııalyq shaǵymdardyń túsýine baılanysty kúshine enbegeni belgili boldy, dep habarlaıdy QazAqparat Qazaqstannyń depozıtterdi kepildeý qorynyń baspasóz qyzmetine silteme jasap.
Almaty qalalyq sotynyń resmı hatyndaǵy aqparatqa qaraǵanda, apellıatsııalyq shaǵymdar 2019 jylǵy 9 qańtar kúni saǵat 10:30-da qaralady.
Qazaqstannyń depozıtterdi kepildeý qory «Astana Banki» AQ salymshylaryn tek resmı aqparatty basshylyqqa alyp, azamattyq istiń sottaǵy qaralýynyń nátıjelerin kútýge shaqyrady. Qor salymshylardy sot talqylaýynyń barysy jáne nátıjeleri týraly resmı rastalǵan aqparattardy www.kdif.kz saıtynda jáne BAQ-ta jarııalap otyrady.
«Astana banki» salymshylarǵa jalpy 37 mıllıard teńge tóleýi tıis, Jeke tulǵalar men jeke kásipkerlerdiń «Astana Banki» AQ-da ashylǵan depozıttik shottarynyń 99,9 paıyzy tolyq kólemde tólenetinine kepildik beriledi.
«Astana Bank» AQ-nyń árbir salymshysynyń depozıtiniń tólenýine kepildik beriledi, óıtkeni ol Qordyń arnaýly rezervinen iske asyrylady. Al Qordyń arnaýly rezervi únemi bankterdiń jarnalary esebinen tolyqtyrylyp otyrady, qazir arnaýly rezervte 773,7 mıllıard teńge qarajat bar. Salymshylardyń salǵan qarajattarynyń tólenýi bank aktıvteriniń budan keıingi taǵdyryna baılanysty emes.
Salymshylar QDKQ call-ortalyǵyna qysqa 1460 nómiri arqyly habarlasýyna bolady, sondaı-aq Qordyń resmı-saıtyna saýal joldap, Telegramdaǵy @kdif_ask chatyna júgine alady.
Salymnyń syıaqysy, salym somasynyń rastalýy sekildi suraqtar boıynsha «Astana banki» AQ salymshylary banktiń ákimshiligine +7 (727) 259 60 60 nómiri arqyly habarlasýyna bolady.
«Astana Banki» AQ Qazaqstan Respýblıkasy Ulttyq Bankiniń 2018 jylǵy 18 qyrkúıektegi sheshimimen barlyq túrdegi bank operatsııalaryn júrgizý lıtsenzııasynan aıyrylǵan bolatyn. 26 qarasha kúni Almaty qalasynyń mamandandyrylǵan aýdanaralyq ekonomıkalyq soty «Astana Banki» AQ-ny májbúrli túrde joıý týraly sheshim shyǵardy.
27 jeltoqsan kúni Almaty qalalyq soty joǵarydaǵy sot sheshiminiń zańdy kúshine enbegenin málimdedi. Oǵan mamandandyrylǵan sottyń 26 qarashadaǵy sheshimine alty zańdy tulǵadan jáne úsh jeke tulǵadan apellıatsııalyq shaǵymdar túsken.
Qazaqstannyń depozıtterdi kepildeý qory QR Ulttyq Bankiniń 1999 jyly qurylǵan uıymy. Ol ekinshi deńgeıli bank salymshylarynyń quqyqtary men zańdy múddelerin qorǵaıdy. Qazirgi kezde depozıtterdi kepildeý júıesine 26 bank qatysady.
«Astana bankiniń» bir salymshysyna tólenetin eń joǵary soma: teńgemen salynǵan depozıtter boıynsha - 10 mln teńge, sheteldik valıýtamen salynǵan depozıtter boıynsha - 5 mln teńge, al bir salymshynyń ári teńgemen, ári shetel valıýtasymen salǵan depozıti boıynsha - 15 mıllıon teńgeni quraıdy.
