«Astana Ballet» teatry qala kúnine erekshe qoıylym daıyndap jatyr
ASTANA. QazAqparat - Astana kúnin atap ótýge sanaýly ýaqyt qaldy. Qazir qaladaǵy barlyq óner ujymdary qyzý daıyndyq jasap, árqaısysy kórermendi ózindik tosyn syımen qýantpaq. Qurylǵanyna nebary eki jyl bolsa da, ózindik kórermeni bar memlekettik «Astana Ballet» teatry da biregeı qoıylym daıyndap jatyr. Bir aktili baletti qoıýǵa teatr basshylyǵy reseılik horeograf Nıkıta Dmıtrıevskııdi shaqyrǵan.
Bul týraly astana.kz jazady.
Nıkıta Dmıtrıevskıı, reseılik horeograf:
«Bul tehnıka, mýzyka, horeografııa men jaryqtyń qosyndysy. Qoıylym sátti shyǵýy úshin úlken shyǵarmashylyq top jumyldyrylǵan. Onyń ishinde kompıýterlik grafıka, sýretshiler, anımatorlar, sazgerler bar. Osylaı bárimiz jumyla jumys istegende spektakl sátti shyǵady dep senemin».
Aıgúl Tatı, «Astana Ballet» memlekettik teatrynyń bas baletmeısteri:
«Astana balet» ujymy 2 jyldan beri úlken tájirıbe jınady. Repertýardyń keńeıip, balalardyń mashyqtanǵany úlken tájirıbeniń nátıjesi. 01-25 Kúndegi daıyndyq bizdiń jetispegen plastıkamyzdy, basqa da jaqtarymyzdy damytyp, jumys isteý barysyndamyz. Jańa qoıylym halyqtyń kóńilinen shyǵady dep oılaımyn».
Teatr ujymy 3D-meppıng pen vıdeoınstallıatsııa mamandaryn da arnaıy shaqyryp otyr. «Álem» dep aıdar taqqan týyndy b.d.d zamannan bastap búginge deıingi kórinisti kórermen aldyna ákelmek. Qazir sońǵy jumystar pysyqtalyp, arnaıy mýzyka jazylyp, kostıýmder tigilýde. «Sulýlyq álemdi qutqarady», demekshi, sulýlyq pen álem ushtasqan qoıylymǵa balet ártisteri myqty daıyndyqpen kelgen.
Aınur Sultanǵojaeva, «Astana Ballet» memlekettik teatrynyń ártisi:
«Bul biz úshin jańa baǵyttaǵy qoıylym. Nıkıta Dmıtrııevskıımen jumys isteý barysynda biz úlken tájirıbe alýdamyz. Onyń bı qoıý ereksheligi meniń oıymsha qazaq jáne Eýropa bı ónerlerin sıntezdeý. Az ýaqyt aralyǵynda spektakl qoıý árkimniń qolynan kele bermeıdi dep oılaımyn. Bul biz úshin úlken jaýapkershilik. Halyqtyń kóńilinen shyǵady degen oıdamyz».
Tusaýkeseri 27 maýsymǵa josparlanǵan qoıylymǵa 40-qa jýyq ártis qatysady. Odan keıin teatr ujymy Eýropa elderine gastroldik saparǵa attanbaq.
