«Astana Balette» «Kúlbıke» baletiniń premerasy ótedi
NUR-SULTAN. QazAqparat – Jeltoqsannyń 20, 21 men 22 kúnderi eki kórinisti «Zolýshka» baleti qoıylady. Bul týraly QazAqparat «Astana Baletke» silteme jasap habarlaıdy.
Premeraǵa daıyndyq eki aı buryn bastalǵan. Horeograf Nadejda Kalınınanyń aıtýynsha, «Zolýshka» - shyǵarmashylyq jolyndaǵy eń kúrdeli jobalarynyń biri.
«Bul alǵash qoıylyp jatqan dúnıe. Horeografııa, dekoratsııa, kostıýmder, beıne kontent – osynyń bárin oıdan shyǵaryp, arnaıy «Astana Balet» úshin daıyndap, kıimderin tigip jatyrmyz. Adam balasy ertegini qajetsinedi. Bizdiń maqsat otbasyńyzben birge kóretin, zamanaýı stılde jasalǵan, tartymdy keıipkerleri kóp, ázili bar jarqyn spektkl jasaý. Balette komedııa janry múldem sırek qoldanylady, óıtkeni, sahnada tentektiń keıipin somdaý, kúldirý óte kúrdeli. Ol úshin belgili bir dárejede ishki bostandyq qajet», - deıdi baletmeıster.
Kúlshe qyzdyń ógeı ápkeleri, olardyń kavalerleri, Ógeı Sheshe, tipti Hanzadanyń ózine qyzyqty horeografııalyq replıkalar qosylǵan.
Horeograf Nadejda Kalınına lıbrettonyń da avtory. Dekoratsııa men kostıým sýrteshisi - tanymal stsenograf Sergeı Novıkov. Onyń ınterpretatsııasyna sáıkes, balet oqıǵasy Zolýshkanyń kúndeligi retinde órbıdi. Sol sebepti, kitap taqyryby spektakldiń ón boıynan seziledi: dekoratsııada, kishigirim býtaforııa men kostıýmderde.
Aldaǵy premeraǵa teatrdyń balet trýppasy túgel qatysady. Naqty eshkimniń esimin ataǵan joq, degenmen bir nárse aıqyn. Basty partııalardyń birine ártisterdiń úsh-tórt quramyn daıyndap otyr.
Spektakl 20-jeltoqsanda, saǵat 19:30, al, jeltoqsannyń 21, 22 kúnderi, saǵat 18:00 bastalady.
