«Astana balet» teatrynyń ujymyna klassıkadan jetkilikti dárejede sabaq alý qajet - RF halyq ártisi A. Asylmuratova
ASTANA. QazAqparat «Astana balet» teatrynyń ujymy jas, sondyqtan olarǵa kóp daıyndyqpen qatar, klassıkadan jetkilikti dárejede sabaq alý qajet.
Mundaı pikirdi búgin «Astana balet» teatrynyń «Ǵasyrdan ǵasyrǵa» atty balet keshiniń ashyq daıyndyǵy barysynda ataqty balerına, Reseı Federatsııasynyń halyq ártisi Altynaı Asylmuratova bildirdi.
«Árıne, bizdiń kórermen qaýymǵa usynaıyn dep otyrǵan balet keshimizdiń baǵdarlamasy óte kúrdeli, ásirese "Astana balet" sııaqty jas ujymǵa tipten aýyr soǵary túsinikti. Óıtkeni biz bul keshke álemdik horeografııa jaýharlarynan qurastyrylǵan týyndylardy kiristirip otyrmyz. ıAǵnı bul horeografııanyń úsh ǵasyryn qamtıtyn eki bólimdi balet bolady. Onyń baǵdarlamasyn "Korsar" baletinen "Jańǵyrǵan baq" kórinisi jáne Mıhaıl Fokın men Anna Pavlova qoıǵan horeografııalyq mınıatıýralar quraıdy», - dep túsindirdi maman.
Onyń aıtýynsha, bul qoıylym kórermenderge sheksiz áser syılap qana qoımaı, "Astana balet" teatrynyń ujymyna da úlken mektep bolmaq.
"Maǵan bul ujymmen jumys isteý óte unady. Qyzdar jap-jas bola tura eńbekqor, jetistikke jetýge umtylady. Degenmen olardyń klassıkalyq repertýarlar boıynsha jumys isteý tájirıbeleri áli de bolsa jetispeıdi. Sondyqtan bul jaǵdaıda tek jattyǵýlar ǵana emes, sonymen qatar sabaqtar ótkizý de óte mańyzdy", - dep atap ótti A. Asylmuratova.
Aıta keteıik, atalǵan balet keshi 28 qańtarda Beıbitshilik jáne kelisim saraıynda ótedi. Keshti uıymdastyrýǵa Sankt-Peterbordan belgili pedagog-horeograftar Altynaı Asylmuratova men Elena Sherstneva arnaıy shaqyrylǵan bolatyn.
