«Astana balet» teatrynyń uzaq gastroli Mınskiden bastalady

Teatrdyń jazǵy gastroli Mınsktegi «Baletnoe leto v Bolshom» Halyqaralyq festıvalinen bastalmaq. Belarýs, Reseı, Polsha men Germanııa juldyzdary qatysatyn Balet óneriniń festıvali maýsym aıynyń 11 men 18 aralyǵynda Ulttyq akademııalyq Úlken opera jáne balet teatrynda ótedi.

«Bizdiń basty maqsatymyz - jaqsy óner kórsetip, shet eldik kórermendi baýrap alyp, elimizdiń baı mádenıetin pash etý. «Ár jerdiń salty basqa» demekshi, ár eldiń kórermeni ártúrli. Al, endi, teatrymyzdyń janryn eskersek, ol bárine birdeı unaıdy. Bizdiń gastroldik baǵdarlama festıval talaptaryna sáıkes jasalǵan, sebebi, kórermenimiz de alýan-túrli bolmaq. Qazaqstannyń balet ónerin álemdik sahnalarda joǵary dárejede kórsetý úshin bar kúshimizdi salamyz», - deıdi, teatr dırektory Valerıı Kúzembaev.

Festıvalde balet ártisteri óz repertýaryndaǵy ǵajaıyp, jarqyn qoıylymdardy kórsetedi. Onyń ishinde: «Alýan-túrli bı», «Gaia», «Love Fear Loss», «Baıaý jalyn», «Karmen», «Saǵym sátteri».

«Alýan-túrli bı» - kópshilikke tanymal klassıkalyq mýzykaǵa qoıylǵan neoklassıkalyq dıvertısment. Spektakl barysynda kostıýmder, bı qımyldary ózgergenimen, mýzyka men sıýjet ózgerissiz qalady. Avtor balet óneriniń damýyn, bı evolıýtsııasyn kórsetedi. «Baıaý jalyn» Lalo Shıfrın, Astor Pıatstsolla, Karlos Gardel jáne basqa da tanymal kompozıtorlardyń mýzykasyna qoıylǵan. Bı tiliniń kúshimen avtor alǵashqy mahabbat sezimin kórsetýge tyrysqan. Shoq bolyp janǵan yntyq sezim, naǵyz jalynǵa ulasady.  

«Love Fear Loss» baleti Edıt Pıaf ánderiniń mýzykasyna qoıylyp, áıgili ánshiniń ómirbaıanynan nár alǵan.

Hekel Tavares pen Isaak Albenıstiń mýzykasyna qoıylǵan «Gaia» bir aktili baleti Jer shary jaıly zamanaýı horeografııa tilimen baıandalǵan júrek tebirenter ápsana.

«Shet eldik saparlarymyzda biz ulttyq horeografııa órnekterin de mindetti túrde kórsetemiz. Osyǵan oraı arnaıy daıyndalǵan «Uly Dala murasy» atty baǵdarlamamyz bar. ádette, ulttyq naqyshtaǵy baǵdarlama alǵashqy sátten kórermenniń júregin baýrap alady. Gastrolimizdiń birinshi kúni kórsetiletin «Astana Ballet GALA» baǵdarlamasy bolsa, teatr repertýaryndaǵy úzdik qoıylymdardyń úzindileri. Otandyq jáne shet eldik horeograftar qoıǵan bul spektaklderde qazirgi zamanǵy bı tendentsııalary men trendteri kórinis tapqan. Avtorlar qazaq kompozıtorlarymynyń, etno-folklorlyq toptardyń mýzykasyn, zamanaýı kompozıtorlardyń óńdeýindegi qazaq halyq mýzykasyn keńinen qoldanady», - deıdi, teatr dırektory.

 Sonymen qatar, teatr Jorj Bıze men Rodıon Şedrınniń mýzykasyna qoıylǵan «Karmen» balet-fantazııasyn kórsetedi. Horeograf Mýkaram Avahrı - otandyq bı mektebiniń túlegi. Ol túrli janrdaǵy qoıylymdarda ár qyrynan kórinip keledi. Spektaklde Karmen bir beıne emes, bes túrli kúıde kórinedi. Kórkemdik sheshimi óte qyzyqty bul balette bir de bir er keıipker joq. Belorýs kórermeni, sondaı-aq, jas qytaı horeografy Isıan Chjan qoıǵan «Saǵym sátteri» spektaklin de tamashalaı alady. Lıbretto, stsenografııa men kostıýmderdiń de avtory ózi. Ol osy baletti óziniń ápkesine jáne japly áıel zatyna, onyń ishki álemine arnap shyǵarǵan. Bul fálsafalyq, sıýjetsiz spektakl.

Budan soń, 28 maýsym men 21 shilde aralyǵynda astanalyq trýppa alǵash ret Brazılııanyń iri qalalaryna sapar shegedi. San-Paýlo, Rıo-de-Janeıro, Goıanııa, Resıfı, Natal, Fortaleza men Rıbeırao-Preto qalalarynda teatr ulttyq jáne zamanaýı horeografııanyń úzdik nómirlerimen órnektelgen jańa baǵdarlamasyn pash etedi. Shildeniń biri men ekisi kúnderi teatr óz qoıylymdaryn Goıas shtatynyń astanasy, eki mıllıon turǵyny bar Goıanııa qalasynda ótetin Halyqaralyq bı festıvaliniń aıasynda kórsetpekshi.

Tamyz aıynyń basynda qazaqstandyq balet trýppasy Bodrým (Túrkııa) qalasynda ótetin 15-shi Halyqaralyq balet festıvaline qatysady. Gastrolderdiń arasynda balet ártisteri Halyqaralyq «EXPO 2017» kórmesine de qatysyp, astanalyq kórermenge ónerin pash etpek.

Elimizdiń úzdik shyǵarmashylyq ujymy «Astana Balet» teatrynyń halyqaralyq balet óneri festıvalderine qatysýy, shaqyrýshy jaqtyń tarapynan qolpashtanyp otyrǵanyn atap ótken jón.

«Astana Balet» teatrynyń Halyqaralyq festıvalderdiń aıasynda óner kórsetýiniń arqasynda, shet eldik kórermen teatr repertýarymen tanysyp qana qoımaı, álemdik balet tendentsııalary men trendteri kórinis tapqan qazaqstandyq horeografııa óneri jaıly oı túıedi. «Astana Balet» teatry dástúrli qazaq oryndaýshylyq ónerin saqtap qana qoımaı, jańa balet stılderi men baǵyttaryn batyl ıgerip, tyń tájirıbelerden jasqanbaıtyn tanymal horeograftarmen belsendi shyǵarmashylyq baılanys ornatqan.

 Esterińizge sala keteıik, buǵan deıin, elimizdiń úzdik balet trýppasy óziniń biregeı ári ǵalamat repertýaryn Máskeý, Parıj, Beıjiń, Tokıo, Seýl,    Nıý-Iork, Baký, Varshava, Vena sahnalarynda kórsetip, talǵampaz kórermenniń júreginen oryn alǵan jaıy bar.

Aıta keterligi, «Astana Balet» teatry 2012 jyly quryldy. Munyń ózi Qazaqstan horeografııa óneri tarıhyndaǵy jańa beles. Alǵashqy qoıylymdarynyń ózi kórermen qoshemetine bólenip, qazaqstandyq balettegi jańa tendentsııalar jaıly sóz bastaýǵa muryndyq boldy.

«Astana Balet» Qazaqstan Respýblıkasynyń úzdik horeografııalyq ujymdarynyń biri. Teatr ulttyq jáne zamanaýı horeografııanyń klassıkalyq dástúrleri men tyń tendentsııalaryn utymdy úılestirip keledi.

Teatr repertýary klassıka muralary men otandyq jáne shet eldik tanymal horeograftardyń biregeı horeografııalyq qoıylymdarymen tolyǵyp otyrady.  Alıla Álısheva, Aıgúl Tatı, Gúljan Týtkıbaeva, Mýkaram Avahrı (Qazaqstan); Altynaı Asylmuratova, Nıkıta Dmıtrıevskıı, Nıkolaı Markelov, Georgıı Kovtýn (Reseı); Rıkardo Amarante (Brazılııa); Isıan Chjan (QHR) syndy horeograftarmen tyǵyz shyǵarmashylyq baılanys ornatqan.