«Astana Balet» teatry jańa ǵımaratqa ıe boldy
ASTANA. QazAqparat - «Astana Balet» teatry ornalasqan jańa ǵımarat ishki jabdyǵy men tehnıkalyq sheshimi jaǵynan álemniń úzdik úlgilerine sáıkes keledi. Jańa sahnadaǵy alǵashqy spektaklder 2016 jylǵy 10-11 jeltoqsanda ótedi.
Teatrdyń jalpy kólemi 15,4 myń sharshy metr. Ǵımarattyń ózi de, onyń ıntereri de zamanaýı stılde bezendirilgen.
Kórermen zalynda 783 oryn bar (609 oryndyq parter, 104 oryndyq balkonnyń 2 ıarýsy, 70 oryndyq balkonnyń 3 ıarýsy). Zaldy bezendirgende baısaldy, asyl reńk qoldanylǵan: altyn -qońyr tústi shymyldyq, kreslolar shafranmen qaptalǵan, eden qońyr tústi. Kórermenderge yńǵaıly bolý úshin eki býfet ashylǵan ári foıesi keń. Teatrǵa kelgen saıyn, kórermen qaýym umytylmas oqıǵalarǵa qanyq bolyp, adamzat óneriniń joǵarǵy úlgisi - horeografııadan nár alyp, naǵyz merekelik kóńil-kúıge bólenedi.
Sahnanyń aýdany 536 sharshy metr. Sahna tórt kóterip-túsirý plansheti men tórt ártistik kótergishpen jabdyqtalǵan. Orkestr úńgiri 50-60 mýzykantqa yńǵaılanǵan. «Astana Balet» teatrynyń sahnasynda stsenografııasy kúrdeli spektaklder qoıýǵa bolady. «Astana Balet» teatry sahnasynyń múmkindikteri rejısserler men stsenograftardyń biregeı ıdeıalaryn júzege asyrýyna jol ashady. Jaryq berý kesheninde dástúrli teatr qondyrǵylary jáne júıelerimen qatar, osy saladaǵy sońǵy ınnovatsııalyq jańalyqtar qoldanylǵan. 600-800 jaryq jabdyqtary ornatylyp, sonyń arqasynda kórkem jaryqty joǵary sapada jasaý múmkindigi bar. Sonymen qatar, arnaıy tehnıka beıneproektsııanyń bar múmkindikterin qoldanýǵa múmkindik beredi. Sahnanyń tehnıkalyq múmkindikteri teatrdyń kórkemdik-qoıýshylyq artyqshylyqtaryn arttyryp, túrli janr men stıldegi spektaklderdiń qoıylymyn júzege asyrýǵa mursha beredi. Jańa teatrdyń osy erekshelikteri kórermen qaýymnyń da, rejısserlerdiń de nazaryn ózine aýdarary sózsiz.
Jańa ǵımarat kez-kelgen teatr ujymyn qabyldaı alady: balet, opera, drama. Osy kúni bul - Qazaqstannyń tehnıkalyq turǵydan joǵary sapaly jabdyqtalǵan ámbebap teatry. Sahnanyń parametrleri men múmkindikteri jańa teatrda túrli mádenı sharalar men shyǵarmashylyq keshterdi, sımfonııalyq jáne estradalyq orkestrlerdiń kontsertterin, túrli arnaıy áserler qoldanylatyn zamanaýı shoý men mıýzıklderdi minsiz ótkizýge mursha beredi. Sońǵy jyldary Astanadaǵy teatrsúıer aýdıtorııa ulǵaıyp keledi. «Astana Balet» teatrynyń jańa ǵımaraty elordasynyń mádenı ómirin odan ári jańǵyrtyp, tartymdy ári qyzyqty ete túseri aıqyn.
Jańa teatrdyń ashylýy ónerge degen memlekettik qoldaý men qamqorlyqtyń belgisi. Elordasynda jańa teatrdyń ashylýy turǵyndardyń ómiriniń áleýetin ósirip, Astananyń ımıdjin asyryp, onyń básekege qabilettiligin arttyra túsetini daýsyz. Osy kúni Astanada joǵary sapaly shyǵarmashylyq týyndylardy shyǵarýǵa múmkindik ashyldy. Jańa teatr jas rejısserler, stsenograftar men ártisterdiń sahnadaǵy shyǵarmashylyq izdenisterin júzege asyrýǵa jol ashady.
«Astana Balet» teatry «Qazaq Ulttyq horeografııa akademııasynyń» janynda ornalasqan.
