«Astana Balet» teatry Uly Jibek joly boıymen saıahatqa shaqyrady
«Astana Balet» teatrynyń H mereıtoılyq maýsymy aıaqtalýǵa jaqyn.
Qoıylym avtorlary kórermen qaýymdy Uly Jibek joly boıymen saıahat qurýǵa shaqyrady.
«Bul spektakldiń repertýarymyzda alatyn orny erekshe. Kórermen kózaıymyna aınalǵan týyndy. Ásem, qaıtalanbas týyndy Shyǵystyń tylsym áleminiń syryn asha túsedi. Biz Jibek jolynyń boıyndaǵy elderge saıahat quramyz. Bul balette dástúr men qazirgi zamannyń órnekteri, oryndaýshylardyń sheberligi men ár kórermendi tereń oıǵa jeteleıtin kórinister úılesim tapqan. Bul týyndy kórermen kóńilinen shyǵyp, kópshilik erekshe qyzyǵýshylyqpen tamashalaıtyn spektaklge aınalǵanyn maqtan tutamyz», – dedi «Astana Balet» teatrynyń kórkemdik jetekshisi Nurlan Kanetov.
«Jibek joly» spektakli – shyǵys kolorıti, ótken dáýirdiń qaıtalanbas atmosferasy, sahnanyń bezendirilýi men biregeı horeografııa tili úılesim tapqan naǵyz mádenı qazynaǵa aınaldy. Sıýjet ıirimderinen tarıh taǵylymyn tanyp, mádenıetterdiń ózara almasýy men adamdar arasyndaǵy qarym-qatynastyń erekshe mańyzǵa ıe ekenin túsinemiz.
Balet tórt kompozıtordyń shyǵarmasyna súıenip qoıylǵan. Atap aıtqanda Arman Amar, Vladımır Ivanoff, Omar Farýk Tekbılek jáne Renat Ǵaısın.
«Mereıtoılyq maýsymymyzdy erekshe maqtanyshpen atap ótip jatyrmyz. Sebebi, bizdiń shyǵarmashylyǵymyzǵa kóńil bóletin kórermen qaýymmen birlesip, bolashaq tarıhtyń órnegin salyp jatyrmyz. Kórermenniń ystyq yqylasynyń arqasynda jetken jetistigimiz barshylyq. 10 jylda biz ǵalamat spektaklder shyǵaryp, myńdaǵan adamnyń júreginiń tórinen oryn alǵanymyz aqıqat. Sondyqtan, biz úshin ár kórermen qymbat, olardyń qoldaýynyń arqasynda biz shabyt alyp, jańa belesterge umtylamyz. Bolashaqta alar asýymyz, tyń shyǵarmashylyq belesterimiz kóp bolaryna senimdimiz», – dedi teatr dırektory Aleksandr Sovostıanov.
