«Astana balet» teatry Taldyqorǵanda alǵash ret óner kórsetti
TALDYQORǴAN. QazAqparat - Astananyń 20 jyldyǵyna oraı «Astana balet» teatry el ishinde gastroldik saparmen júr. Olar alǵash ret Almaty oblysynyń ortalyǵy Taldyqorǵanda óner kórsetti, dep habarlaıdy QazAqparat tilshisi.
Astana balettiń myń buralǵan bıshileri Іlııas Jansúgirov atyndaǵy mádenıet saraıynda Petr Chaıkovskııdiń bir aktili «serenadasyn» shyǵaryp, kórermenderdi ásemdik pen sulýlyq álemine bóledi. Taldyqorǵandyqtarmen birge qoıylymdy Mádenıet jáne sport mınıstri Arystanbek Muhamedıuly da tamashalady. Іshekti aspaptarǵa arnalǵan serenada 48 shyǵarmadan turady. Sonaý AQSh-ta alǵash sahnalanǵan qoıylym jetisýlyqtardyń kóńilinen shyqty.
«Astana balet» teatrynyń ónerin tamashalap mártebemiz, kóńilimiz kóterilip qaldy.Bizdiń Qazaqstanda osyndaı talantty jastarymyzdyń bar bolǵany úshin qatty rıza boldym. Kıimderi de, ónerleri de keremet. Talantty jastarymyzdyń qatary arta bersin», degen jyly lebizin kórermenniń biri Qalqa Baljanova bildirdi.
Óner ujymy Elbasy bastamasymen 2012 jyly quryldy. Trýppaǵa Seleznev atyndaǵy Almaty horegrafııa ýchılışesiniń úzdikteri iriktelinip alynǵan. 65 adamnan quralǵan shyǵarmashylyq top elimizdiń ońtústik óńirlerin aralap shyqty. Endi olar batysqa jol tartpaq.
«Biz Taldyqorǵanǵa deıin Almaty jáne Qyzylorda qalalarynda boldyq. 25 mamyrda Aqtaý qalasyna gastroldik saparmen baramyz dep josparlap otyrmyz. Kórermenderimizge tamasha kesh syılaı úshin biz Astanadan ózimizdiń mýzykalyq apparatýramyzdy da alyp keldik», - deıdi «Astana balet» teatrynyń dırektory Valerıı Kýzembaev.
Bıshilerge Almaty oblysy ákiminiń, Mádenıet jáne sport mınıstriniń yqylas gúlderi tabystaldy.
