«Astana Balet» teatry Nıý-Iorkte óner kórsetedi

Túrli janrdaǵy horeografııalyq ónerdiń bul kórsetilimi QR Mádenıet jáne sport mınıstrliginiń bastamasymen ótkizilip otyrǵan «Jahandaǵy zamanaýı Qazaqstan mádenıeti» jobasynyń aıasynda uıymdastyrylmaqshy. Bul týraly QazAqparat «Astana Balet» teatrynyń PR-qyzmetine silteme jasap habarlaıdy.

«Astana Balet» teatrynyń Nıý-Iorktegi bul baǵdarlamasy «El júregi - Astana» atty elordasynyń jıyrma jyldyǵyna arnalǵan merekelik mádenı is-sharalardyń basy bolmaq. Osy jyldardyń ishinde el ordasy Qazaqstannyń ǵana emes, jalpy Ortalyq Azııa aımaǵynyń qoǵamdyq-saıası jáne mádenı ómiriniń iri ortalyǵyna aınalyp úlgerdi. Astana Eýrazııa aýmaǵyndaǵy halyqaralyq ortalyq sanalady.

Lınkoln ortalyǵynda «Astana Balet» trýppasy otandyq horeografııa ónerin alǵash tanystyryp otyrǵan joq. Osydan úsh jyl buryn, jetekshi horeografııalyq ujymnyń amerıkalyq sahnadaǵy debıýti ótip, sulýlyq pen ásemdik, symbat pen názik beıneler álemi Nıý-Iork kórermeniniń tańdanysyn týdyrǵan edi. Bul joly kórermenderdiń yqylasyna bólengen «Astana Balet» atty eń jas qazaqstandyq teatr kontrastty baǵdarlamasyn usynbaqshy. Ol plastıka tilimen jetkizilgen ulttyq mádenıet órnekteri men jarqyn balet spektaklderiniń úzindileri.

«Teatrdyń shyǵarmashylyq ujymyn úlken jumys kútip tur. Mádenıetimizdi tanystyryp, Qazaqstannyń ulttyq jáne zamanaýı balet ónerin álemdik qaýymdastyqqa pash etip, kórermen peıilin ózimizge qaratyp alýymyz kerek», - dedi, teatr dırektory Valerıı Kúzembaev.

«Astana Balet» klassıkalyq mura men zamanaýı balet óneriniń bar baılyǵyn boıyna sińirip, sonyń negizinde tyń horeografııalyq týyndylar men oryndaýshylyq ónerdiń jańa úlgilerin jasap keledi. «Astana Balet» teatry zamanaýı baǵyttaǵy ulttyq bıdi zerttep, damytýǵa da basa kóńil aýdaryp, qazaq bıiniń sulýlyǵy men plastıkalyq úılesimdigin ashatyn jańa horeografııalyq mınıatıýralar shyǵaryp júr. Munda halyq bıiniń tamyry tereń, erekshe sıpatyna, onyń bolmysyna barynsha mán beriledi. Sebebi, ulttyq bı arqyly kórermen bizdiń mádenıetimizben tanysady. Sondyqtan ulttyq bı, teatrdyń barlyq gastroldik saparlaryndaǵy kontserttik baǵdarlamalarǵa qosylyp, bizdiń teatrdy áıgilep turǵan dúnıege aınaldy.

«Nıý-Iorkke saparymyzdan keıin, teatr jańa shyǵarmashylyq belesterdi baǵyndyrýǵa qanattanady dep oılaımyn. Jas ártister úshin gastrol - shyǵarmashylyǵyna shabyt bitiretin dúnıe, sonymen qatar, jańa kórermen, bóten aýdıtorııanyń aldynda óz kúsh-qýatyń men múmkindigińdi synaýdyń joly. Nıý-Iorktegi gastrolge repertýarymyzdaǵy eń úzdik qoıylymdardy tańdadyq - «Uly Dala murasy» atty horeografııalyq mınıatıýralar men balet úzindilerinen quralǵan ulttyq baǵdarlama; Altynaı Asylmuratova qoıǵan «Şelkýnchık» baletinen pa-de-de; «Divercity» jáne «A fuego lento» atty neoklassıkalyq baletterdiń úzindileri, belgııalyq horeograf R.Amaranteniń «Love Fear Loss» atty bir aktili baleti qoıylady», - deıdi teatrdyń bas baletmeısteri Mýkaram Avahrı.

«Uly Dala murasy» baǵdarlamasyna ulttyq boıaýy qanyq horeografııalyq mınıatıýralar men balet úzindileri enip otyr. Barlyq kompozıtsııalardan halyq dástúriniń baılyǵyn tanyp, san-qyrly emotsııalyq kúıge bólenesiz. Kórkem mýzyka, qaıtalanbas kórkem beıneler arqyly bul qoıylymdar júregińizdiń túbine boılap, jadyńyzda hattalyp qalady. «Uly Dala murasy» baǵdarlamasyna qarap, jarqyn, ekpindi damyp kele jatqan ári biregeı zamanaýı ulttyq balet jaıly baǵamdaýǵa bolady.

«Love Fear Loss» (mýzyka - Edıt Pıaf repertýaryndaǵy ánderdiń taqyryby, horeograf - Rıkardo Amarante) - Edıt Pıaftyń ǵajaıyp ómirinen nár alyp, onyń ánderiniń áýeninen sýsyndaǵan týyndy. Munda áıgili ánshiniń túrli erlermen qarym-qatynasy kórinis tapqan. Bir arnaǵa toǵysqan Pıaf ánderi mahabbat uranyna aınalyp, álemdi tamsandyrdy. Balettiń ár dýeti qushtarlyq pen mahabbat, aıyrylyp qalý qaýpi men úreı sezimderin órnekteıdi.

«A fuego lento» atty kelesi bir aktili balet - mahabbat sezimine alǵash elitken tustaǵy boıyńyzdy bılegen úreı men dúleı kúshti sıpattaıdy. Tánińiz erekshe kúıge bólenip, al, qushtarlyq sezimi tula-boıyńyzdy órteıdi. Ǵashyq jannyń árqaısysy úshin kúlli álem súıiktisiniń aınalasyna toǵysyp, ómirdiń máni tek mahabbat bolmaq. (mýzyka - Lalo Shıfrın, Astor Pıatstsolla, Karlos Gardel, Horeograf - Rıkardo Amarante).

Repertýardyń san-alýandyǵy, oryndaýshylyq sheberlik pen sahnalyq bezendirýdiń joǵary sapasynyń arqasynda «Astana Balet» teatrynyń qoıylymdary óz elimizde ǵana emes, shetelderde de zor qoshemetpen qabyldanady.

Esterińizge sala keteıik, «Astana Balet» teatry Máskeý men Sankt-Peterbor (Reseı), Beıjiń (Qytaı), Parıj (Frantsııa), Vena (Avstrııa), Seýl (Koreıa), Býdapesht (Majarstan), Baký (Ázerbaıjan), Mınsk (Belarýs), Nıý-Iork (AQSh), Tokıo (Japonııa), Varshava (Polsha), Brıýssel (Belgııa) qalalarynyń áıgili sahnalarynda óner kórsetken.