«Astana Balet» teatry Brıýsselde Uly Dala muralaryn kórsetti

BRıÝSSELЬ. QazAqparat - «Astana Balet» teatrynyń ártisteri kásibı sheberligimen, shynaıylyǵymen belgııalyq ónersúıer qaýymnyń júregin jaýlap aldy, dep habarlaıdy «QazAqparat» HAA-nyń menshikti tilshisi.

11 qarashada «Astana Balet» teatrynyń shyǵarmashylyq trýppasy «Rýhanı jańǵyrý» baǵdarlamasynyń aıasynda alǵash ret Belgııanyń BOZAR óner ortalyǵynyń sahnasynda týyndylaryn usyndy. Klassıkalyq spektaklmen qatar qazaq ulttyq bılerin de qamtıtyn «Uly Dala muralary» baǵdarlamasyna kórermender erekshe qoshemet kórsetti.

«Zamanaýı baǵyttan bólek, ulttyq horeografııanyń úzindilerin de engizdik, óıtkeni tól ónerimizdi, ulttyq kıimderimiz ben bılerimizdi álemge tanytqymyz keledi», - deıdi «Astana Balet» teatrynyń dırektory Valerıı Kúzembaev.

Balet repertýarynda «Mahabbat Aıyrylý Qorqynysh» (Love Fear Loss), «Mazdaǵan ot» (A fuego lento), «Kleopatra» sııaqty biraktili baletter boldy. Al uly aqyn Abaı poezııasynyń marjanyna órilgen «Mahabbat tili» jáne túrki eposyna qurylǵan «Álem» baletteri, qazaq halyq kompozıtory Qurmanǵazynyń «Balbyraýyn» kúıine qurylǵan mınıatıýra, ataqty kompozıtor Dına Nurpeıisovanyń mýzykasyna qurylǵan «Ásem qońyr» mınıatıýrasy, sondaı-aq «Aq qyz», «Qýanamyn» bıleri belgııalyqtardy erekshe tánti etti.

«Búgin ómirimdegi eń ǵajap baletti kórdim. Tamasha oryndaý tehnıkasy, tól horeografııanyń sapasy meni baýrap aldy. Bolashaqta mindetti túrde osy balettiń otanyna baramyn dep kókeıime túıip qoıdym», - deıdi Belgııa horeografııa mektepteriniń biriniń muǵalimi Fransýaza Magotý.

Baǵdarlamanyń sońynda zal ornynan turyp zor qoshemet kórsetti.