«Astana Balet» teatrynyń 2026 jylǵy jospary qandaı
ASTANA. KAZINFORM — Ótken maýsym «Astana Balet» teatrynyń damý baǵytyn, ulttyq, halyqaralyq sahnadaǵy deńgeıin aıqyn kórsetti. 2026 jyl da kórkem ıdeıalar men premeralarǵa jáne túrli gastroldik jobalarǵa toly bolary anyq.
QR Mádenıet jáne aqparat mınıstrliginiń baspasóz qyzmetiniń málimetinshe, klassıkalyq mura men zamanaýı horeografııa arasyndaǵy dıalogty qalyptastyratyn premeralyq qoıylymdarǵa erekshe kóńil bólinip, jańa aýqymdy spektaklder usynylatyn bolady.
Solardyń biri — Morıs Raveldiń mýzykasyna qoıylǵan zamanaýı bir aktili «Bolero H» baleti. Boléro orkestrlik varıatsııalary negizinde jasalǵan qoıylym, kórermenge bıdiń tabıǵaty men onyń tarıhy týraly baıandaıdy. Bul qoıylym HH ǵasyrdyń mýzykalyq jaýharyn oı eleginen qaıta ótkizip, zamanaýı qoıylymdar arqyly teatr kórermen qaýymǵa erekshe horeografııa álemin pash etedi.
Teatrdyń bas baletmeısteri Mýkaram Avahrı qoıylymyndaǵy «Qyz Jibek» baleti repertýardan erekshe oryn alary anyq. Spektakl dástúrli obrazdy zamanaýı sahnalyq sheshimdermen úılestire otyryp, qazaq klassıkasynyń mazmunyn ashyp, mádenı muraǵa yjdaǵattylyqpen qaraýdy úlgi etedi.
Álemdik klassıka jaýhary — «Baıaderka» baletiniń aýqymdy premerasy maýsymnyń mańyzdy oqıǵasy bolmaq. Bul týyndyǵa nazar aýdarý arqyly «Astana Balet» teatry akademııalyq dástúrdi saqtap, otandyq kórermenge álemdik balet repertýarynyń úzdik týyndylaryn joǵary kásibı deńgeıde usynýǵa daıyndyǵyn rastaıdy.
— 2026 jylǵy repertýarda álemniń klassıkalyq baletteri, zamanaýı horeografııalyq jobalar, ulttyq baǵdarlamalar men kontserttik qoıylymdar bar. Teatrdyń sımfonııalyq orkestri qatysatyn spektaklder men kontsertter, sondaı-aq hor, solıster men shaqyrylǵan dırıjerler óner kórsetetin jobalar da mańyzdy. Teatr mýzykalyq baǵytty tereńdetip, orkestrdi jeke kórkem ujym retinde tanytyp, kontserttik qyzmetin de jalǵastyrady, — delingen habarlamada.
Bıyl «Astana Balet» teatry gastroldik saparlarǵa baryp, óner kórsetpek. El óńirlerin aralap, álem sahnalarda mádenı tájirıbıe jınaý josparda bar. Bilim berý jáne áleýmettik jobalarǵa, onyń ishinde Akademııamen yntymaqtastyqty damytý, jas horeograftar men ártisterdi qoldaý, sondaı-aq halyqaralyq shyǵarmashylyq bastamalardy iske asyrýǵa erekshe nazar aýdarylatyn bolady.
Osydan buryn úsh teatrda qoıylǵan «Şelkýnchık» baleti 40 myńnan astam kórermen jınaǵanyn jazǵanbyz.