«Astana Balet» teatry Koreıadaǵy dúnıejúzilik festıvalge qatysady
ASTANA. KAZINFORM — Ońtústik Koreıanyń Chhonan qalasynda 24-28 qyrkúıek aralyǵynda dúnıejúziniń bı ujymdaryn biriktiretin «Cheonan World Dance Festival 2025» iri halyqaralyq forýmy ótedi. Bul týraly QR Mádenıet jáne aqparat mınıstrliginiń baspasóz qyzmeti habarlady.
Túrli mádenıettiń ereksheligin pash etetin aýqymdy festıval osy kúnderi Chhonandy álemdik bı astanasyna aınaldyrdy.
Atalǵan is-sharaǵa «Astana Balet» teatrynyń ártisteri qatysyp, «Uly Dala murasy» dıvertısmentiniń úzindilerin usynady. Bul — Qazaqstanda ǵana emes, shet elderde de kórermen kóńilinen shyǵyp úlgergen baǵdarlama. Estetıka, kóz jaýyn alar kórkem obrazdar, ásem kostıýmder men qazaq horeografııasynyń maǵynalyq tereńdigi kópshilikti tánti etip keledi.
«Uly Dala murasy» — qazaq mádenıetiniń ásemdigi men san qyrly bolmysy jaıly myń buralǵan bıshilerdiń áńgimesi ispetti. Baǵdarlama aıasynda lırıka men oı-tolǵamǵa toly kompozıtsııalar, jigerli ári ekspressııaly mınıatıýralar, sondaı-aq fılosofııalyq turpattaǵy qoıylymdar jınaqtalǵan. Keń pishilgen, jarqyn ári talǵampaz oıý-órnekke baı halyq kostıýmderi erekshe áser qaldyrady. Ár obraz ejelgi dástúr, kóshpeli mádenıetti sıpattaıtyn oıý-órnek sımvolıkasy men tabıǵat syryn ashatyndaı.
— «Astana Balet» teatrynyń Chhonan 2025 dúnıejúzilik festıvaline qatysýy halyqaralyq mádenı yntymaqtastyqty damytýdyń dańǵyl joly. Shetel sahnasynda óner kórsetý qazaq mádenıetiniń murasyn tanytýǵa, túrli elder arasyndaǵy ózara túsinistikti nyǵaıtýǵa jáne bı óneri halyqtardy biriktiretin ámbebap til ekenin kórsetýge múmkindik beredi, — delingen habarlamada.
Buǵan deıin Abaı oblysynyń teatrlary eki birdeı halyqaralyq baıqaýda top jarǵanyn jazǵan bolatynbyz.