«Astana Balet» spektaklderdiń onlaın-kórsetilimin bastaıdy
NUR-SULTAN. QazAqparat - 20 sáýirden bastap «Astana Balet» teatry «Eurasian Dance Festival» birlese otyryp, astanalyq teatr sahnasynda ótken halyqaralyq balet óneri festıvaliniń aıasynda kórsetilgen spektaklder men gala-kontsertterdiń vıdeojazbalaryn onlaın-rejımde usynady, dep habarlaıdy QazAqparat.
«Ártister men kórermenderdiń teatr zalyna qaıta oralýyn kúte otyryp, Eýropa men Azııanyń aıtýly teatrlary men bı ujymdary bizdiń sahnada kórsetken jarqyn qoıylymdarynyń beınejazbalarynyń arhıvterin kórseteıik dep sheshtik. Úsh jyl ishinde, bul balet festıvali Qazaqstannyń mádenıetindegi eleń eterlik qubylysqa aınaldy. Kórermen qaýymdy osy qoıylymdarmen tanysýǵa ıa bolmasa súıikti spektaklderin qaıta tamashalaýǵa shaqyramyz», - dedi teatr basshylyǵy.
Kórermen qaýym álemdik klassıka jaýharlary, halyq shyǵarmashylyǵy men qazirgi zamanǵy áıgili horeograftardyń týyndylary túıisken festıval jazbalaryn tamashalaı alady.
Kórermenmen qaýyshýdyń jańa formaty Qazaqstan, Reseı, Portýgalııa, Gollandııa jáne Germanııa ártisteri qatysqan juldyzdy gala-baletten bastalmaq. Alǵashqy onlaın-kórsetilim 20 sáýirde, Nur-Sultan qalasynyń ýaqyty boıynsha saǵat 20:00-de «Astana Balet» teatrynyń resmı YouTube-arnasynda usynylady. Tikeleı efırdi kórip úlgermegender spektakldi keıingi 24 saǵat ishinde tamashalaı alady.
22 sáýir, saǵat 20:00-de áıgili ıspanııalyq bı trıosy Castro Romero usynǵan «Escencia Flamenca» baǵdarlamasynyń onlaın-kórsetilimi ótedi.
30 jyldyq ǵumyrynda bul ujym kóptegen jobalardy júzege asyrǵan. Sonyń ishinde, tanymal ártistermen jumys istep, fılmderge túsip, álemdik opera juldyzdarymen kontsertterge qatysqan. «Flamenko kvıntessentsııasy» baǵdarlamasy 10 bólimnen turady. Munda ártister flamenko men onyń bolmysy týraly baıandaıdy.
Festıvalge qatysqandardyń biri – Qytaı ulttyq baletin 24 sáýirde, saǵat 20:00 kóre alasyz. Eki bólimnen turatyn baǵdarlamaǵa horeograftar Van Tsı men Feı Bonyń eki mınıatıýrasy engen. Sıan Sınhaı mýzykasyna qoıylǵan «Sary ózen» baletiniń sońǵy eki bólimi men P.I.Chaıkovskııdiń «Patetıkalyq» sımfonııasynyń mýzykasyna qoıylǵan «Ómir dastany» baleti.
Aıta keteıik, spektaklder YouTube-arnasynyń «Premeralar» formatynda kórsetiledi. Platformadan spektaklderdiń bastalýy jaıly habarlama alý úshin «Astana Balet» teatrynyń resmı arnasyna tirkelý qajet.
