«Astana Balet» qyz-kelinshekterdi merekelik keshke shaqyrady
ASTANA. QazAqparat - «Astana Balet» teatrynda Halyqaralyq áıelder kúnine oraı «Kóktemniń shýaǵy» atty balet keshi ótedi, dep habarlaıdy QazAqparat.
Júz jyl buryn Volter, barlyq qarama-qaıshylyqtar áıel júreginde toǵysatynyn aıtqan edi. Gala kontsert baǵdarlamasy da, klassıktiń osy paıymyna qaraı qurastyrylǵan: emotsııalyq qýaty ártúrli nómirler názik jandylardyń bolmysynyń san-alýan qyryn ashady. Alolardyń bárin biriktiretin leıtmotıv - kóktem qarsańyndaǵy romantıkalyq kóńil-kúı.
Kontserttiń birinshi bóliminde Glıýktiń nazdy «Melodııasyn» solıster Aınur Núspekova men Farhad Býrıev oryndaıdy.
Sondaı-aq balet óneriniń sımvolyna aınalǵan Anna Pavlovanyń qurmetine «Kalıfornııalyq mak» bıi oryndalady. Petr Chaıkovskııdiń mýzykasyna qoıylǵan bıde, balerına ómirdiń baıansyzdyǵyn kóktemgi gúldiń dirildegen japyraqtary arqyly jetkizedi. Jel tursa, olar úzilip ketýge shaq. Bul bıdi balet solısteri Nadejda Omarova men Aınur Ábilǵazına oryndaıdy.
Balettiń jetekshi solısteri Rıza Qanatqyzy men Tatıana Ten «Diversity» baletiniń partııalaryn kórsetedi. Petro Maskanıdiń alǵashqy úzindisi máńgilik mahabbattyń romantıkalyq urany ispetti, al Massne mýzykasyna qoıylǵan ekinshi úzindi ıspan áýenderiniń ekpindi yrǵaǵyna qarama-qaıshy oryndalady.
Atalǵan mınıatıýralardan bólek, birinshi bólimde, sonymen qatar Rahmanınov, Gýno men Mınkýs mýzykasy áýeleıdi. Sońǵy epızod retinde Morıs Raveldiń «Kleopatra» baletiniń aqyrǵy sahnasy alynǵan.
Ekinshi bólimde, Rıkardo Amaranteniń «A fuego Lento» bir aktili baleti kórsetiledi. Munda boıjetken men bozbalanyń bas qosqan kezinde paıda bolatyn sezim tolqynyn kórýge bolady: bastapqy qyzyǵýshylyqtan bastap, jan-tánińdi órtegen qumarlyqqa deıin. Balettiń emotsııalyq tusyn áserletý úshin baletmeıster brazılııalyq sambo bıiniń elementterin qoldanady.
Kontsert elordada 8 jáne 9 naýryz kúnderi ótedi.
