«Astana balet» qoıylymdary 360 gradýs formatynda kórsetiledi
Teatrda ótken baspasóz máslıhatynda «Astana balet» dırektory Aleksandr Sovostıanov «AB-MEDIA» teatrlyq strımıng servısin qurý bastamasy jaıly aıtyp berdi.
«Bıylǵy jyl barshamyzǵa ońaıǵa soqpady. Dese de, biz úshin jańa bastamalar engizý turǵysynda jemisti boldy. Bul jobany damytý ıdeıasy kezekti onlaın konferentsııada paıda boldy. Biz kórermenge jaqyn bolǵymyz keldi jáne teatrdyń kókjıegin keńeıtkimiz keldi. Búgin aıtyp otyrǵan strımıng qyzmeti de teatrǵa kóbirek barýǵa jáne sahnada bolyp jatqan oqıǵalarǵa tikeleı qatysýǵa múmkindik bererine úmittenemiz», - dedi Aleksandr Sovostıanov.
Jańa strımıng alańynyń basty ereksheligi – tek standartty tolyq formatty kontsertter, spektaklder men derekti fılmder ǵana emes, 360 gradýs formatynda túsirilgen qoıylymdar da enedi.
360 gradýstyq qoıylym arnaıy kameramen túsiriledi jáne barsha tóńirekti qamtıdy.
Qarapaıym jalpaq dıspleıden tamashalaǵanda kórermen kórsetilim baǵytyn panorama retinde baqylaı alady, al VR-kózildirik kıse – sol kórsetilim ishinde júrgendeı áser alady.
Qazirgi ýaqytta 360 gradýs formatyndaǵy eki spektakldiń túsirilimi aıaqtaldy. Olar – Sergeı Prokofevtyń «Kúlshe qyz» eki aktili baleti jáne qazaqstandyq horeograf Anvara Sadyqovanyń «Jeltorańǵy týraly ańyz» bir aktili baleti.
Taıaýda spektakl kórsetilimine bıletter satyla bastaıdy jáne bir bılet quny shamamen 500 teńge bolmaq.
Bıletti álemniń kez kelgen óńirindegi kórermen ala alady jáne qoıylymdar qazaq, orys jáne aǵylshyn tilderinde taratylady.
«AB-MEDIA» jobasynyń avtory Pavel Kogaı teatr qoıylymdaryn úı jaǵdaıynda jáne álemniń kez kelgen núktesinde qalaı kórýge bolatynyn túsindirdi.
«2020 jyldy onlaın is-sharalar jyly dep ataýǵa bolady. Osy strımıngtik júıemizdi tanystyrýdy josparlaǵanda onyń qoljetimdi jáne túsinikti bolýyn maqsat ettik. Sol úshin strımıngtik júıemizdi teatr saıtyna ornalastyrdyq jáne mobıldi formatta da qoljetimdi ettik. Joǵarǵy oń jaq buryshta tirkeý batyrmasy bar. Onda elektrondy poshta mekenjaıy men telefon nómirin jazyp tirkelý kerek. Tirkelgen soń teatr, repertýar týraly aqparat qoljetimdi bolady, kórermender jeke kabınetine kirip, óz tapsyrystaryn kóre alady. «Tólem ádisi» terezesi shyqqanda, 500 teńge tólep, kontentti tamashalaýǵa bolady. Telefondy vırtýaldy kózildirikke salyp kórýge bolady nemese telefonnyń ózin aınaldyrýǵa bolady», - deıdi P. Kogaı.
