«Astana balet» Italııanyń Mılan qalasynda óner kórsetedi
ASTANA. QazAqparat - «Astana balet» teatry 9-10 qyrkúıekte Mılan qalasynyń ortalyǵyndaǵy «Teatro Nuovo» sahnasynda óner kórsetetin bolady, dep habarlaıdy QazAqparat teatrdyń baspasóz qyzmetine silteme jasap.
Teatr gastroli Mádenıet jáne sport mınıstriginiń muryndyq bolýymen, «Rýhanı jańǵyrý» ulttyq baǵdarlamasynyń aıasynda júzege asyrylyp otyr.
«Astana balet» teatrynyń ujymy «Jahandaǵy zamanaýı Qazaqstan mádenıeti» jobasyn júzege asyrýǵa at salysyp, otandyq ónerdiń jaıharlaryn álem sahnalarynda tanytyp keledi.
«Bıyl Astananyń 20 jyldyǵy atalyp ótýde. Osy oqıǵanyń aıasynda, biz, Astananyń eń jas teatrynyń shyǵarmashylyq izdenisterin ıtalııandyq kórermen nazaryna usynbaqshymyz. Trýppamyz úshin, gastrol - shyǵarmashylyqty yntalandyrýdyń kilti, álemniń dańqty qalasynyń aýdıtorııasy aldynda kúshimizdi synap kórýdiń múmkindigi. Talǵampaz kórermen bizge qoshemet bildirer, degen úmittemiz», - deıdi, teatr dırektory Valerıı Kúzembaev.
Onyń aıtýynsha, teatr ózindik óner týyndylaryn ulttyq mol muraǵa súıene otyryp, álemdik mádenıet áserimen dúnıege ákeledi.
Qazaqstannyń balet ujymy «Astana Balet Gala» atty mazmuny biregeı kontserttik baǵdarlamany tartý etpek. Onyń ishine ulttyq horeografııanyń jaýharlarymen qatar, trýppa repertýaryndaǵy neoklassıkalyq mınıatıýralar enip otyr.
Baǵdarlamaǵa ulttyq boıaýy qanyq horeografııalyq mınıatıýralar men balet úzindileri engen. Bul kompozıtsııalardyń bári baı halyq dástúrimen, san-qarlylyǵy jáne mol qýatymen erekshelenedi. Ǵajap mýzyka, qaıtalanbas kórkem beıneler kórermen kóńilin baýrap alady.
Ulttyq taqyryptan bólek, kórermen qaýym teatr repertýaryndaǵy Rıkardo Amarante qoıǵan neoklassıkalyq spektaklderdiń úzindilerin tamashalaı alady. Onyń «Love Fear Loss, «A fuego lento» baletteri kórermenniń ystyq yqylasyna bólenip keledi.
