«Astana Balet» elorda dárigerlerine arnap úsh qaıyrymdylyq kontsertin ótkizdi
NUR-SULTAN. QazAqparat - Ótken demalys kúnderi «Astana Balet» teatrynda koronavırýs ınfektsııasymen kúreste myńdaǵan adamǵa demeý bola bilgen dárigerler men barlyq medıtsına qyzmetkerlerine arnalǵan úsh qaıyrymdylyq kontserti ótti, dep habarlaıdy QazAqparat.
«Biz úıde oqshaýlanyp otyrǵanda, dárigerler jumys ornynda qalyp, adamdardyń densaýlyǵy men ómiri úshin jan aıamaı kúresti. Sol sebepti de, biz, jańa maýsymnyń alǵashqy on kontsertin medıtsına qyzmetkerlerine arnap, osylaısha alǵysymyz ben qurmetimizdi bildirgimiz keldi», - dedi «Astana Balet» teatrynyń dırektory Aleksandr Sovostıanov.
Astanalyq teatr ártisteri eki bólimnen turatyn kontserttik baǵdarlamasyn tartý etti: Rıkardo Amaranteniń «LoveFearLoss» bir aktili baleti men «Uly Dala murasy» dıvertısmenti. Osy horeografııalyq toptamaǵa Aıgúl Tátı, Anna Tsoı, Zaýyrbek Raıbaev, Dáýren Ábirov syndy keshegi jáne búgingi qazaqstandyq baletmeısterler qoıǵan 13 bı mınıatıýrasy engen.
Kontserttiń erekshe mıssııasy jaıly «Astana Balet» teatrynyń horeografy, Qazaqstannyń eńbek sińirgen qaıratkeri Aıgúl Tátı aıtyp berdi.
«Bizdiń horeografııalyq tartýymyz shynaıy qurmetten týyndap otyr. Biz bul ónerdiń emdik qasıetine senemiz. Ol rýhyńyzdy asqaqtatyp, janyńyzdy jadyratady. Qazirgideı kúrdeli kezeńde munyń ózi óte mańyzdy», - deıdi ol.
«Astana Balet» teatrynyń jetekshi solısi Aıjan Muqatova da onyń bul oıymen kelisip, ilip áketti.
«Qıyndyqqa tózip, óz ómirine tóngen qaýipke qaramaı, dárigerlik mindetin adal atqaryp júrgen adamdarǵa degen qurmetim sheksiz», - deıdi ol.
Jeti júzden astam adamǵa arnalǵan kórermen zaly burynǵydaı emes, ózgesheleý kórindi: astanalyq sanıtar dárigerdiń qaýlysyna sáıkes spektakl aýdıtorııasy elý adamnan aspaýy tıis. Alaıda, osynshalyqty bos zaldyń ózinde kontsertten keıin ártisterge kórsetilgen qoshemet óte zor edi.
«Erekshe estetıkalyq lázzat aldym. Ártisterdiń plastıkasy qandaı, shirkin?! Zamanaýı órnekterge baı ulttyq naqyshtaǵy bı qandaı?! Bári óte ádemi, óte áserli boldy. Talantty ártisterińiz qýanyshty kóńil-kúıimen bólisti. Muny ár kórermen sezingenine shúbám joq», - deıdi qalalyq ftızıopýlmonologııa ortalyǵynyń dárigeri Gúlnár Amanjolova.
Teatr basshylyǵy on qaıyrymdylyq kontsertin ótkizýdi josparlaǵan, sonyń altaýy Shymkent pen Nur-Sultan qalalarynda ótti.
Qarasha aıynda teatr Qaraǵandy men Semeıde taǵy 4 qaıyrymdylyq kontsertin ótkizbekshi.
