Astana Bakýde medıtsınalyq týrızm múmkindikterin tanystyrdy
ASTANA. KAZINFORM — Baký qalasynda Astananyń medıtsınalyq týrızmine arnalǵan halyqaralyq roýd-shoý ótti. Іs-sharaǵa Qazaqstan men Ázerbaıjannyń jetekshi medıtsınalyq uıymdary, týrızm ındýstrııasynyń ókilderi jáne eki eldiń kásibı qaýymdastyǵy qatysty, dep habarlaıdy Kazinform agenttiginiń menshikti tilshisi.
Іs-sharany Astana Tourism týrızmdi damytý ortalyǵy Qazaqstannyń Ázerbaıjandaǵy elshiligi jáne Ázerbaıjannyń medıtsınalyq ári termaldy týrızmdi qoldaý qaýymdastyǵynyń qoldaýymen uıymdastyrdy.
Qazaqstannyń Ázerbaıjandaǵy elshisi Álim Baıel roýd-shoýdyń eki el arasyndaǵy yntymaqtastyqty nyǵaıtýdaǵy mańyzyn atap ótti.
— «Roýd-shoý Qazaqstan men Ázerbaıjan arasyndaǵy densaýlyq saqtaý jáne medıtsınalyq týrızm salasyndaǵy yntymaqtastyqty kúsheıtetin mańyzdy alańǵa aınaldy. Onyń basty maqsaty — Qazaqstan astanasynyń zamanaýı medıtsınalyq qyzmetterin halyqaralyq naryqta tanytý, eki eldiń klınıkalary men týrıstik kompanııalary arasyndaǵy seriktestikti damytý jáne sheteldik patsıentterdi Astanaǵa em alýǵa tartý», — dedi ol.
Іs-shara barysynda elordadaǵy jetekshi medıtsınalyq uıymdar óz jetistikterin tanystyryp, dıagnostıka men emdeýdiń ozyq tásilderin usyndy.
Sondaı-aq Astana medıtsınasynyń joǵary tehnologııalyq múmkindikteri kórsetildi.
Búginde Astana Ortalyq Azııadaǵy medıtsınalyq týrızmniń jetekshi ortalyqtarynyń biri retindegi pozıtsııasyn nyǵaıtyp keledi.
Qalada halyqaralyq Joint Commission International (JCI) standarttary boıynsha akkredıttelgen 9 medıtsınalyq uıym jumys isteıdi.
Bul kórsetkish medıtsınalyq qyzmet sapasy men qaýipsizdiginiń joǵary deńgeıin aıǵaqtaıdy.
Іs-shara qatysýshylarynyń erekshe qyzyǵýshylyǵyn neırohırýrgııa, onkologııalyq aýrýlardy emdeý, balalardy ońaltý, reprodýktıvti medıtsına jáne estetıkalyq hırýrgııa baǵyttary týdyrdy.
Atalǵan salalar ázerbaıjandyq patsıentter arasynda suranysqa ıe baǵyttardyń qatarynda.
Astana delegatsııasynyń quramyna balalardy ońaltýdyń ulttyq ortalyǵy, neırohırýrgııa ulttyq ortalyǵy, ulttyq ǵylymı onkologııa ortalyǵy, Ecomed klınıkasy jáne Tulip Medicine ókilderi kirdi.
Olar óz múmkindikterin tanystyryp, ázerbaıjandyq áriptesterimen birlesken jumystyń perspektıvalaryn talqylady.
Roýd-shoý baǵdarlamasyna medıtsınalyq uıymdardyń tanystyrylymdary, B2B kezdesýler jáne yntymaqtastyq týraly memorandýmdarǵa qol qoıý rásimi endi.
Іs-sharanyń jalǵasy retinde 17 maýsymda Citomed klınıkasy bazasynda Baký turǵyndary úshin tegin alǵashqy konsýltatsııalar uıymdastyryldy.
Astanadan barǵan jetekshi mamandar patsıentterdi qabyldap, dıagnostıka men emdeý máseleleri boıynsha kásibı keńes berdi.
Sarapshylardyń pikirinshe, Bakýdegi bul roýd-shoý Astananyń medıtsınalyq týrızm strategııasyn iske asyrýdaǵy mańyzdy qadam boldy.
Bul bastama Qazaqstan men Ázerbaıjan arasyndaǵy yntymaqtastyqty keńeıtip, óńir turǵyndarynyń zamanaýı medıtsınalyq tehnologııalarǵa qoljetimdiligin arttyrýǵa múmkindik beredi.
Osyǵan deıin Qazaqstan men Ázerbaıjan birlesken týroperatordy iske qosqany týraly jazdyq.
