Astana Azııanyń týrızm qalasy mártebesin alý úshin baq synamaq
ATYRAÝ. 18 jeltoqsan. QazAqparat - Bolashaqta Astana barsha álemniń týrısterine arnalǵan Azııanyń bas qalasyna aınalýy múmkin. Qazaqstandyq tarap jaqyn arada elordamyzdyń Azııanyń týrızm qalasy mártebesin alýy úshin barlyq sharany qolǵa almaq. Bul týraly astana.kz saıtyna QR IJTM Týrızm ındýstrııasy komıtetiniń baspasóz qyzmetinen habarlady.
«Azııanyń týrızm qalasy» mártebesin bekitý týraly sheshim Azııa dıalogy jónindegi 12-shi mınıstrler kezdesýde qabyldandy, oǵan QR Indýstrııa jáne jańa tehnologııalar mınıstrligi Týrızm ındýstrııasy komıtetiniń tóraǵasy Marat Iǵalıev qatysty.
Kezdesý barysynda «Azııalyq týrızmdi damytý tujyrymdamasy» qabyldandy. Tujyrymdamanyń basty tarmaǵy týrısterge arnalǵan Azııadaǵy bas qalany tańdaý bolyp tabylady.
«Azııanyń týrızm qalasy» mártebesi bir elge bir jylǵa ǵana beriledi. Azııadaǵy 30-dan astam memleket tańdalǵan qalany kópshilikke tanytyp, belsendi túrde jarnamalaıtyn bolady. Aıta keteıik, 2014 jyly Bahreın koroldiginiń astanasy Manama qalasy Azııanyń týrızm qalasy bolyp tanylǵan edi.
