Astana Azııanyń eń keremet jerleriniń alǵashqy ondyǵyna endi
ASTANA. QazAqparat - Eń iri ári yqpaldy basylymdardyń biri - Lonely Planet basylymy Astanany týrıster 2017 jyly barýy tıis Azııanyń eń kórnekti jerleriniń alǵashqy ondyǵyna engizdi, dep habarlaıdy «QazAqparat» HAA tilshisi.
Basylym sarapshylary «sheksiz jazyq dalanyń júreginde ornalasqan áınek pen bolattan jasalǵan saǵym» Astanany reıtıngtiń 5-ornyna ornalastyrdy. Lonelyplanet.com «Astana óziniń kók tiregen záýlim úıleri, úlken alańdary jáne bulyńǵyr áınekti pıramıdasy men Memleket basshysy Nursultan Ábishuly Nazarbaevtyń fýtýrıstik qııalynyń bir bólshegine aınaldy» dep jazdy. Basylym bıylǵy jazda Astanada turaqty jáne jańǵyrtylatyn energııa kózine arnalǵan EKSPO-2017 kórmesi ótip jatqandyǵyn eske sala ketti.
Týrısterdiń eshbir kedergisiz kórmege kelýi úshin Qazaqstan 45 memleketpen vızasyz keli rejımin iske qosty, olardyń qatarynda EO elderi, AQSh, Kanada jáne Avstralııa bar.
Reıtıng basynda Qytaıdyń ortalyq bóliginiń soltústiginde ornalasqan Gansý provıntsııasy turǵandyǵyn aıtyp ótken jón. Ekinshi oryndy eki Japon qalasy bólisken, iri portty qala Iokogama jáne eldegi eń kóne qalalardyń biri Kamakýra.
Eger týrıster jylynyp alǵylary kelse, olar reıtıngtiń úshinshi baǵanynda ornalasqan Úndistannyń Kerala shtatyndaǵy kúngeıli jaǵajaılarǵa barýyna bolady. Astanadan sál ǵana ilgeri tórtinshi orynǵa tamaq talǵaǵyshtardyń jumaǵyna aınalǵan Sıngapýrdyń Keong Saık Roýd kvartaly ornalasqan.
Lonely Planet usynǵan Azıanyń eń keremet jerleriniń ondyǵyna Takaıama (Japonııa), Sıan (Qytaı), Kandı (Shrı-Lanka), Malakka (Malaızııa) jáne Radja-Ampat (Indonezııa) engen.
Lonely Planet basylymy 1972 jyly Avstralııada qurylǵan. Ony 2007 jyly BBC-diń kommertsııalyq agentti - BBC Worldwide satyp aldy.
