Astana Azııanyń týrıstik naryǵyndaǵy ornyn nyǵaıtyp keledi
ASTANA. KAZINFORM — Shanhaıda 26-28 mamyr kúnderi Qytaı naryǵyna basymdyq berilgen, sol sııaqty kirý jáne shyǵý týrızmin damytýǵa baǵyttalǵan mańyzdy halyqaralyq kásibı alańdardyń biri — ITB China 2026 halyqaralyq týrıstik B2B kórmesi ótip jatyr. Bul týraly Astana qalasynyń ákimdigi málim etti.
Kórme aıasynda Astana qarqyndy damyp kele jatqan halyqaralyq týrıstik baǵyt retinde tanystyrylyp jatyr.
2025 jyldyń qorytyndysy boıynsha Astanaǵa 1,6 mıllıonnan astam týrıst kelgen. Bul aldyńǵy jylmen salystyrǵanda 7 paıyzǵa kóp.
Negizgi týrıstik aǵyndy Qytaı, Túrkııa, Reseı, Germanııa jáne AQSh elderinen kelgen qonaqtar quraıdy.
Qazirgi tańda qalada halyqaralyq jelilerdi qosa alǵanda 310-nan astam qonaqúı men 2 255 qoǵamdyq tamaqtaný nysany jumys isteıdi. Onyń 525-i — meıramhana (QR Ulttyq statıstıka bıýrosynyń deregi boıynsha).
Qalada qonaqúı jáne meıramhana salasy turaqty damyp, qyzmet kórsetý sapasy artyp, halyqaralyq standarttar kezeń-kezeńimen engizilip keledi.
— Іskerlik týrızmniń MICE-segmentin damytýǵa da erekshe nazar aýdarylyp otyr. 2025 jyly elordada jalpy aýdıtorııasy 150 myńnan asatyn qatysýshyny qamtyǵan shamamen 190 halyqaralyq is-shara ótkizildi. Bul Astananyń óńirlik iskerlik týrızm ortalyǵy retindegi pozıtsııasynyń nyǵaıyp kele jatqanyn kórsetedi, — delingen habarlamada.
Elorda ekspozıtsııasyna týrıstik ındýstrııadaǵy jetekshi qazaqstandyq jáne halyqaralyq kompanııalar qatysyp jatyr. Atap aıtqanda, airastana.com, Luxury Services Kazakhstan, Shef Tour, Beijing Palace Soluxe Hotel Astana, SAAD Hotel Astana, Kazzhol Astana Hotel, EZ Tours, Kontakt Agency, Wyndham Garden Astana, Kompas Tour jáne Complete Service Tourism Company bar.
Іskerlik baǵdarlama aıasynda Astana delegatsııasy halyqaralyq týroperatorlarmen, MICE-kompanııalarmen jáne salalyq seriktestermen 100-den astam B2B kezdesý ótkizedi. Bul kezdesýler týrıstik aǵyndy arttyrýǵa jáne elordanyń Azııa naryǵyndaǵy pozıtsııasyn nyǵaıtýǵa baǵyttalǵan.
— Astananyń ITB China 2026 kórmesine qatysýy Azııa naryǵynda elordanyń básekege qabiletti týrıstik ári iskerlik baǵyt retindegi halyqaralyq brendıngin odan ári kúsheıtýge baǵyttalǵan, — dedi Oljas Ibraev.
Eske sala keteıik, jaqynda Premer-mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen Týrızm salasyn damytý máseleleri jónindegi úılestirý keńesiniń alǵashqy otyrysy ótkizgen bolatyn.
