Astana aınalasyna 4,1 mln. astam kóshet egiledi
ASTANA. QazAqparat - 2016 jyly elordanyń «jasyl beldeýi» aýmaǵynda aýdany 291 gektar jerge 353 560 kóshet otyrǵyzylady. 2017-2030 jyldar aralyǵynda aǵash egýge jaramdy jalpy aýdany 9 827 gektar jerge jobalardyń tórt kezeńimen aǵash otyrǵyzý josparlanǵan, onyń ishinde 2 792 gektarǵa jabyq tamyr júıesimen 4,1 mln. danadan asa kóshet egiledi. Budan bólek, bıotoptar qurylyp, 1749 gektar jerge shóp ósiriledi.
2012 jyldan 2015 jylǵa deıin birinshi jáne ekinshi kezektegi jobany iske asyrý aıasynda orman alqabynda aýdany 1 032 gektar jerge jabyq tamyr júıesimen 1 493 000 kóshet, sondaı-aq 180 gektar jerge kópjyldyq shóp egildi. Ósimdikterdiń ortasha tamyr alyp ketýi 90%-dy quraıdy. Búginde «jasyl beldeý» aýmaǵynda qoıan, túlki, qarsaq, shilder men qyrǵaýyl qustary tirshilik etedi. 2015 jyly odan ári ósirip, kóbeıtý maqsatynda «jasyl beldeý» aýmaǵyna 4083 qyrǵaýyl jiberildi. Qazirgi kezde torlarda 400 eresek qyrǵaýyl jáne olardyń 1500-den astam balapany ósirilip jatyr. «Jasyl beldeýdiń» aýdany 14,8 myń gektardan artyq, munda 9,7 mln. jýyq aǵash pen 1,9 mln. buta ósedi. Elorda turǵyndary men qonaqtarynyń demalýyna ekologııalyq qolaıly jaǵdaı jasaý úshin qalanyń aınalasynda eki rekreatsııalyq orman-saıabaq aımaǵyn: «jasyl beldeýdiń» ońtústik-batys bóliginiń 25 gektar aýmaǵynda, sondaı-aq «soltústik tizbek» ýchaskesiniń 100 gektar aýmaǵynda orman qurý kózdelgen, dep habarlaıdy elorda ákimdiginiń baspasóz qyzmetinen.
