«Astana» áıelder velokomandasy bıyldan bastap el namysyn qorǵaıdy
ASTANA. QazAqparat - Sochı qalasynda Qazaqstannyń velosıped sporty federatsııasynyń vıtse-prezıdenti «Samuryq-Qazyna» UÁQ» AQ basqarýshy dırektory Darhan Qaletaev Halyqaralyq velesıpedshiler odaǵynyń (UCI) prezıdenti Braıan Kýksonmen kezdesti, dep habarlaıdy federatsııanyń baspasóz qyzmetinen.
Kezdesý kezinde aımaqtaǵy velosıped sportynyń damýy sóz boldy. D.Qaletaev Kýksondy «Astana proteam» komandasynyń perspektıvasy men bıylǵy jyldyń basynda tirkelgen jańa joba - «Astana bıpınk» áıelder velokomandasy týraly habardar etti.
B.Kýkson óz kezeginde qazaqstandyq velosport federatsııasynyń bastamasyna qoldaý bildirdi. Atap aıtqanda, aldaǵy ýaqytta Astanada tas jolda jáne trekte ótkiziletin Azııa chempıonaty men 2015 jylǵa josparlanǵan jasóspirimder arasyndaǵy álem chempıonaty men «Týr Almaty» velojarysyn sátti ótetinine senim bildirdi.
Sondaı-aq B.Kýkson D.Qaletaevtyń Astanada ótetin Azııa chempıonatyna mártebeli meıman retinde qatysý týraly resmı shaqyrýyn qabyl aldy.
