Astana aıaldamalarynda jaıaý júrginshilerge arnalǵan arnaıy pannolar paıda boldy (FOTO)
ASTANA. QazAqparat - Astana qalasynyń polıtseıleri «Nazar aýdaryńyz - jaıaý júrginshi!» respýblıkalyq sharasynyń aıasynda qalalyq ákimdiktiń qoldaýymen aıaldama pavılondarynda aqparattyq pannolardy ornatty. Bul týraly elordalyq ІІD ákimshilik polıtsııasy basqarmasynyń baspasóz qyzmetinen habarlady.
«Jaıaý júrginshilerdiń qatysýymen bolatyn jaraqattanýdyń aldyn alý maqsatynda biz Astananyń 11 aıaldama kesheninde jol qozǵalysy erejelerin úıretetin aqparattyq pannolardy ornatyp, olardyń nazaryn osylaısha aýdartýdy sheshtik. Olar balalar bolsyn, eresekter bolsyn - aıaldamada kólik kútý kezinde oqýyna arnalǵan», - dep habarlady Astana qalalyq ІІD ÁPB-nyń erekshe tapsyrmalar jónindegi aǵa ınspektory Larısa Krasnıkova.
Ol qalalyq avtobýstardyń ekrandarynda sondaı-aq jaıaý júrginshilerdiń qatysýymen bolatyn jol-kólik oqıǵalarynyń aldyn alý boıynsha beınebaıandar kórsetilip júrgenin atap ótti. Bul jaıaý júrginshilerdiń astanalyq kóshelerde jol júrý erejelerin saqtaýyna septigin tıgizedi.
Astana qalalyq ІІD ÁPB-niń málimetterinshe, qalada 4 aıdyń ishinde 200-den astam apat tirkelip, sonyń saldarynan 200-den astam adam jaraqat aldy. Jaıaý júrginshilerdiń qatysýymen bolǵan oqıǵalardyń saldarynan 2 adam qaza taýyp, taǵy 43-i túrli dene jaraqattaryn alǵan 44 kólik apaty boldy.
Elordanyń jol-patrýldik polıtseıleri bıylǵy jyly jaıaý júrginshilerdiń jol-kólik erejelerin buzýynyń 9,5 myńnan astam faktisin anyqtaǵan. Kún saıyn jol-patrýldik polıtsııanyń ınspektorlary jaıaý júrginshiler tarapynan bolatyn 60-tan 80-ge deıin ereje buzýshylyqtardy anyqtaýda.
