"Astana" aıaqdopshylary kıshınevtik "Akademııa ÝTM" komandasymen kúsh synasady
ALMATY. 18 aqpan. QazAqparat - Búgin "Astana" fýtbol klýby Túrkııanyń Antalıa qalasyndaǵy 3-shi oqý-jattyǵý jıynyndaǵy ekinshi baqylaý matchyn ótkizedi.
Olardyń bul jolǵy qarsylasy Moldovanyń Kıshtınev qalasynyń "Akademııa ÝTM" komandasy bolmaq. Ulttyq dıvızıonynda óner kórsetetin kıshınevtikter 2012/2013 jylǵy maýsymda úzdik bestiktiń qatarynda kele jatyr. Astanalyqtardyń baspasóz qyzmetiniń habarlaýynsha, olardyń qarsylasynyń quramynda qazaqstandyqtarǵa, ásirese qyzylordalyqtarǵa jaqsy tanys eki aıaqdopshy bar. Olar buryn Qyzylordanyń "Qaısar" komandasynda oınaǵan qorǵaýshy Adrıan Kashkaval men Taraz qalasynyń "Taraz" jáne Qostanaıdyń "Tobyl" komandalarynda da óz baǵyn synap úlgergen Dmıtrıı Bogdan. Jalpy kıshınevtikter ótken jyly da qysqy maýsymaralyq úzilis kezinde astanalyqtarmen sparrıngtik kezdesý ótkizip, 3:1 esebimen basym túsken bolatyn.
«Astana» fýtbol komandasy alǵashqy baqylaý matchynda buǵan deıin Ýkraına Premer-lıgasynda óner kórsetetin Poltava qalasynyń «Vorskla» komandasyna 0:3 esebimen utylǵan bolatyn. Jalpy 12 aqpanda bastalǵan bul jıyn 23 aqpanǵa deıin sozylmaq.
