Astana avtoturaqtary ákimdikke qaıtaryldy: Tarıf qalaı ózgeredi

ASTANA. KAZINFORM — Astanada barlyq avtoturaq qala menshigine qaıtarylatyn boldy. Elorda ákimi Jeńis Qasymbek kósheler boıyndaǵy ashyq avtoturaqtardyń jańa jumys júıesi týraly aıtyp berdi.

Onyń aıtýynsha, kósheler boıyndaǵy ashyq avtoturaqtarda mınýttap tóleý júıesi bolmaıdy.

— Qalalyq qyzmetterde mınýttap tóleý jospary joq. Biz búkil álemde qabyldanǵan tájirıbege saı jumys isteımiz: 15 mınýt, jarty saǵat, bir saǵat sekildi belgili bir ýaqyt aralyǵy bolady, osy ýaqyt ishinde kólikti aqysyz qoıýǵa bolady. Barlyǵy ornalasqan jerine jáne qalanyń naqty bir bóligindegi júktemege baılanysty bolady. Árıne, saralap tóleý bolady, biraq mınýttap tóleý qarastyrylmaǵan, — dedi J. Qasymbek Ortalyq kommýnıkatsııalar qyzmetinde ótken baspasóz máslıhatynda.

Sondaı-aq ol avtoturaq keńistigin ákimdikke berý jóninde jeke kompanııamen qujattarǵa qol qoıylǵanyn habarlady.

— Biz sottasyp, belgili bir sot rásimderinen óttik, nátıjesinde qujatqa qol qoıyldy. Eki taraptan da eshqandaı ótemaqy tólemderi bolmaıdy. Qazirgi tańda osy kompanııanyń basqarýynda bolǵan barlyq jer telimderi óteýsiz negizde beriledi. Sonymen birge, búkil ınfraqurylym da qosa beriledi — shlagbaýmdar, ózge de nysandar, sonyń ishinde tsıfrlyq júıe men platformalar, — dep atap ótti qala ákimi.

J. Qasymbek qala turǵyndarynyń pikirin eskere otyryp, birqatar nysandy qaıta qaraý josparlanyp otyrǵanyn aıtty.

— Árıne, áleýmettik nysandardyń aldynda aqyly avtoturaqtar bolmaıdy. Al qala ortalyǵynda — Dostyq, Qonaev kósheleri sııaqty qozǵalys óte qarqyndy aımaqtarda kóptegen álemdik astanalardyń tájirıbesin qoldanamyz. ıAǵnı, qala ortalyǵyna kólikpen kirý qymbat bolady. Máselen, Máskeýde Tverskaıa kóshesiniń boıyna kólikti qoıý 20 myń rýblge aınalady. Avtoturaqtardy berý protsesi aıaqtalǵan soń, biz keıbir oryndy qaıta qaraımyz, kóptegen aýmaq múldem tegin bolady, — dep qosty Jeńis Qasymbek.

Osyǵan deıin Astana ákimi qardyń az jaýýyna baılanysty qar tazalaý jumystaryna jumsalatyn qarajattyń únemdelgenin aıtty.

Sonymen qatar Jeńis Qasymbek elordada ekinshi áýejaı salynýy múmkin degen qaýeset jóninde pikir bildirdi.