Astana avtoparki 90-ǵa jýyq avtobýspen tolyqty
ASTANA. QazAqparat – Astana qalasyna 90-ǵa jýyq jańa avtobýs jetkizildi. Osy aıda taǵy 40-qa jýyq avtobýs ákelinedi. Bul týraly qala ákimi Jeńis Qasymbek Instagram paraqshasynda jazdy, dep habarlaıdy QazAqparat.
Qoǵamdyq kóliktiń bir bóligi – elektr avtobýstary. Jańa avtobýstar ıntellektýaldy baqylaý júıesimen, pandýstarmen jáne erekshe qajettiligi bar jandarǵa arnalǵan arnaıy oryndarmen jabdyqtalǵan.
«Jalpy, bıyl qoǵamdyq kólik parkin 400 avtobýsqa arttyrýdy josparlap otyrmyz. Máselen, kún saıyn jelige orta eseppen 900 avtobýs shyǵady. Osylaısha, 400 jańa avtobýs avtoparkti edáýir ulǵaıtýǵa, jańa marshrýttardy iske qosýǵa, qoǵamdyq kólikti kútý ýaqytyn qysqartýǵa, eski avtobýstardy kezeń-kezeńimen aýystyrýǵa jáne t.b. múmkindik beredi», – dedi Jeńis Qasymbek.
Avtobýstardyń bir bóligi «Ónerkásipti damytý qory» AQ arqyly qoǵamdyq kólikti jeńildetilgen lızıngtik qarjylandyrý baǵdarlamasy boıynsha, sol sııaqty jeke avtoparkterdiń qarajaty esebinen satyp alyndy.
