Astana avtomobıl joldary basqarmasynyń bastyǵy kólik keptelisine baılanysty jumysynan qýylady

ASTANA. QazAqparat - Búgin Astana ákimi Áset Isekeshev Qabanbaı batyr dańǵylyn qaıta jóndeý máseleleri boıynsha kóshpeli keńes ótkizdi. Qazirgi kezde bul jaǵdaı elorda turǵyndary men qonaqtaryna yńǵaısyzdyqtar keltirip otyr, dep habarlady qala ákiminiń baspasóz qyzmeti.

Keńes qorytyndysy boıynsha avtomobıl joldary, kólik basqarmalary, ІІD men qalalyq kásiporyndardyń arasyndaǵy jumystyń tıisti deńgeıde úılestirilmegeni úshin Astana ákimdiginiń birqatar laýazymdy tulǵalary tártiptik jazaǵa tartyldy.

Osy salaǵa jetekshilik etetin qala ákiminiń orynbasary Qosman Aıtmuhametovqa eskertý jasaldy.

Ákim Avtomobıl joldary basqarmasynyń basshysy Symbat Myrzaǵulovty qyzmetinen bosatýdy, «Astana Teplotranzıt» AQ men «Astana sý arnasy» MKK basshylaryna qatań sógis, «Astana LRT» JShS basshysyna sógis jarııalaýdy tapsyrdy.

Astana qalasynyń ІІD men Jergilikti polıtsııa qyzmetine tıisti ýchaskelerde qajetti jol belgileri men kórsetkishterdiń qoıylmaýy sebepti týyndaǵan keptelister úshin jaýapty tulǵalardy anyqtap, jazaǵa tartý tapsyryldy.

Qala ákiminiń orynbasary Q. Aıtmuhametov barlyq qyzmetterdiń jumysyn jumyldyryp, Qabanbaı batyr dańǵylyndaǵy qozǵalysty buryn josparlanǵandaı 5 qazanda emes, 20 qyrkúıekke deıin qamtamasyz etýge mindettendi.

«Sizge barlyq quzyret pen múmkindikter berildi. Barlyq jumystardy oqý jyly bastalǵansha aıaqtaýǵa múmkindik boldy. Endi sizderdiń kelispeı áreket etýlerińizdiń saldarynan elorda turǵyndary, ata-analar men balalar mektepterge, balabaqshalarǵa, aýrýhanalarǵa jete almaı otyr», - dedi Áset Isekeshev.

Keńes barysynda jol salý jumystaryn oryndaýdyń jańa tásilderi, qoǵamdyq kólik máseleleri talqylandy. Elorda turǵyndary men qonaqtaryna qolaıly jaǵdaı jasaý basty nazarda. Bul rette osy saladaǵy júıeli jumystar ústimizdegi jyldyń qyrkúıek aıynyń sońyna deıin ázirlenetin Astanany damytýdyń jańartylǵan baǵdarlamasynda kórinis tabady.