Astana avtobýstaryndaǵy kondýktorlar jumyssyz qalýy múmkin
ASTANA. QazAqparat - Astana bıligi qala avtobýstaryndaǵy kondýktorlar qyzmetinen birtindep bas tartýdy josparlaýda, dep habarlaıdy «QazAqparat» HAA tilshisi.
«Múmkin jaz sońyna deıin Shuttle bus-tan bastap, kondýktorlardan múldem bas tartamyz. Tek shuttle bus-taǵy emes, barlyq avtobýstaǵy kondýktorlar qyzmetinen alshaqtaý josparda bar», - dedi Astana qalalyq jolaýshylar kóligi basqarmasynyń basshysy Bekmyrza Igenberdınov baspasóz máslıhaty barysynda.
Ol joldardaǵy kólik keptelisin azaıtý úshin ákimdik júrgizip jatqan sharalar men qala turǵyndarynyń jumys kestelerin ózgertý týraly pikir bildirdi.
«Qarbalas ýaqyttaǵy keptelistiń qanshalyqty azaıatynyn kóremiz. Bul árıne, avtobýstardaǵy adam tyǵyzdyǵyna da áser etedi. Onyń ústine jańadan qosymsha avtobýstardyń satyp alynýy tańǵy 8-degi júktemeni azaıtýǵa múmkindik beredi. Demek, biz jolaýshylardy avtobýstyń aldyńǵy esiginen kirgizip, sońǵy esiginen shyǵara alamyz. Onda bizge kondýktordyń esh qajeti bolmaıdy. Mobıldi valıdatorlar júrgizýshiniń janyna ornatylady», - dep túsindirdi B.Igenberdıev.
Onyń aıtýynsha, tamyz aıynda Astananyń barlyq avtobýstary jolaqyny elektrondy tóleý júıesimen qamtamasyz etiledi. Bul júıeni kótermeıtin eski avtobýstar mobıldi valıdatorlarmen jabdyqtalady.
