Astana avtobýstarynda jolaýshylardyń minip-túsý tártibi ózgeredi
ASTANA. QazAqparat - Astanada qoǵamdyq kólikterge arnalǵan kólik kartasy kóptep satylǵan soń, kondýktorlardyń laýazymy birtindep qysqara bastaıdy, dep habarlaıdy QazAqparat tilshisi.
«2018 jyldyń 21 shildesinde dıfferentsıaldy tarıf engiziletin bolǵandyqtan, kondýktorlar birtindep jumystan shyǵa bastaıdy. Barlyq kondýktordy birden jumystan bosata almaımyz, sebebi kólik kartasyn barlyǵy alyp úlgergen joq, qolma-qol aqshamen eseptesetin jolaýshylar áli de bar. 1-17 shilde aralyǵynda, ıaǵnı eki aptada 42 myń karta satyldy. Buǵan deıin 40 myń kartany úsh aıda satatynbyz. Qazir aptasyna 20 myń kartadan satylady», - dep atap ótti «Astana LRT» kompanııasynyń baspasóz hatshysy Naýat Azanbaeva QazAqparat tilshisine bergen suhbatta.
Onyń aıtýynsha, jumystan bosatylǵan kondýktorlar keńesshi bola alady.
«Jolaýshylardyń 70% astamy kólik kartasyn ıelengen soń, kondýktorlar qyzmeti joıylady. Biraq, olardy jumystan shyǵarmaımyz, jolaqy tóleýdiń aqparattyq júıesi boıynsha keńesshi etip taǵaıyndaımyz. Olar aqparattyq júıeni qalaı qoldaný qajettigin, teńgerimdi qalaı tekserý kerektigin úıretedi. Biraq, olar jolaýshydan eshnárse talap ete almaıdy, bul úshin kóliktik baqylaý júıesi men jelilik baqylaý qyzmeti bar», - dep túsindirdi baspasóz hatshysy.
Sondaı-aq, qoǵamdyq kólikterde jolaýshylardy mingizip-túsirý tártibi de ózgeredi.
«Kondýktorlar ketetin bolǵandyqtan, jolaýshylar avtobýsqa minip-túsý mádenıetin qalyptastyrýy tıis. Ortańǵy esik múmkindigi shekteýli jáne qolarbasy bar jolaýshylarǵa arnalǵan. Al basqa jolaýshylar aldyńǵy esikten kirip, artqy jáne ortańǵy esikten túskenderi jón», - dedi Naýat Azanbaeva.
