Astana avtobýstarynda jolaqyny SMS arqyly tóleý qyzmeti toqtatylady
2505 qysqa nómirine SMS-tólem jasaý – jol júrýdiń balamaly tólem túrleriniń biri. Negizgi ádis – kólik kartasy jáne qolma-qol aqsha arqyly tóleý. Jol júrý aqysyn qolma-qol aqshamen tóleý qazirgi ýaqytta Nur-Sultan qalasy Bas memlekettik sanıtarlyq dárigeriniń engizgen karantındik sharalaryna baılanysty qoldanylmaıdy.
Búgingi kúni jol aqysyn kólik kartasymen, sondaı-aq QR-kod arqyly tóleýge bolady. Ol úshin kelesi mobıldi qosymshalardy qoldanýǵa bolady: Transcard, Kaspi.kz, SMSBUS, Homebank, My Activ, My Beeline, Senim, Rahmet, Astra Bus, Plus24 (Kassa24), Qiwi jáne OYBY.
«Baılanys úzilisteri jolaýshylardyń ózderine qolaısyzdyq týdyrady. Mysaly, SMS arqyly tólem keshiktirilip tólenýi múmkin nemese birneshe ret alynady. Sondaı-aq, qoǵamdyq kólik jolaýshylarynyń jol aqysyn tóleýden jaltarý jaǵdaılary kóp. Máselen, keıbir azamattar jol júrý aqysyn SMS jiberý arqyly baqylaýshylar tekserer aldynda ǵana tóleıdi. Kóliktik baqylaý departamentiniń qyzmetkerleri «SMSBUS kontroler» qosymshasy arqyly avtobýsqa kirgen kezde bir ýaqytta bir aıaldamada SMS habarlamasy arqyly jol aqysyn tóleýdiń 30-dan astam faktisin tirkeıdi. Nátıjesinde shyǵyndar táýligine shamamen 7 mln teńgeni quraıdy. Bul — aıyna 216 mln teńge jáne jylyna 2,5 mlrd teńge», - dedi «City Transportation Systems» JShS Basqarma Tóraǵasy Bekmyrza Igenberdınov.
Nur-Sultan qalasynda SMS joldaý arqyly qoǵamdyq kólikte jol júrý aqysyn tóleý servısi 2018 jyly engizilgen. Servıske barlyq uıaly operatorlar (Activ/Kcell, Beeline, Altel, Tele2) jáne QR kodynyń kómegimen jasalatyn tólem qosylǵan. 2018-2021 jyldar aralyǵynda qoǵamdyq kólikte SMS jáne QR-kod arqyly tóleý elordanyń jalpy jolaýshylar legine shaqqandaǵy san tómendegideı:
– 2018 jyly — QR 0,6%; SMS úlesi 0,4%;
– 2019 jyly — QR 3,2%; SMS úlesi 5,8%;
– 2020 jyly — QR 15,6%; SMS úlesi 12,4%;
– 2021 jyly — QR 29%, onyń ishinde SMS úlesi 12%-dy ǵana quraıdy.
«Uıaly baılanys operatorlarynan SMS tólemdi saqtaýǵa qatysty ujymdyq ótinishterde elordanyń qoǵamdyq kóligin paıdalanýshylar arasynda uıaly telefondardyń az ǵana bóligi ınternetke shyǵý jáne QR-kod arqyly tóleý múmkindiginsiz paıdalanady degen dálelder keltiriledi. Alaıda, tájirıbe kórsetkendeı, kóp jaǵdaıda mundaı paıdalanýshylar — qart adamdar, múgedekter jáne bastaýysh synyp oqýshylary. Azamattardyń osy sanattary úshin jeńildikti jáne mektep kólik kartalaryn paıdalaný arqyly tegin jol júrý qarastyrylǵan. Osy faktilerdi eskere otyryp, SMS habarlamalar arqyly tólemdi paıdalanatyn qoǵamdyq kólik paıdalanýshylarynyń basym bóligi – smartfondary bar ekonomıkalyq belsendi halyq ekenin atap ótýge bolady jáne tólemniń osy túri óshirilgen jaǵdaıda, ol QR-kodty skanerleýmen mobıldi qosymshalar arqyly jol júrý úshin árqashan tóleı alady», — deıdi Nur-Sultan qalasynyń Tsıfrlandyrý jáne memlekettik qyzmetter basqarmasynyń basshysy Botagóz Qasabek.
Máslıhattyń № 167/21-VI sheshimine sáıkes qoǵamdyq kólikte jolaqysyn tóleýden bosatý túrindegi áleýmettik kómek azamattardyń mynadaı sanattaryna tıesili: Uly Otan soǵysynyń qatysýshylary men múgedekterine jáne olarǵa teńestirilgen adamdarǵa, jasyna baılanysty jáne eńbek sińirgen jyldary boıynsha zeınetkerlerge, sondaı-aq zeınetkerlik jasqa tolǵan, jasyna baılanysty jáne asyraýshysynan aıyrylý jaǵdaıy boıynsha memlekettik áleýmettik járdemaqy alýshylarǵa, kópbalaly analarǵa, kópbalaly otbasylarǵa, múgedekterge, 18 jasqa deıingi múgedek balalarǵa, onyń ishinde ata-anasynyń (zańdy ókilderiniń) bireýine.
Sonymen qatar, elorda ákimi Altaı Kólginovtiń tapsyrmasy boıynsha jeke mektep kólik kartasymen valıdatsııalanǵan jaǵdaıda elordanyń oqý oryndarynyń jáne qyzmet kórsetiletin qala mańy aımaqtarynyń oqýshylaryna 7 jastan 18 jasqa deıin tegin jol júrý múmkindigi berildi.
2021 jyldyń basynan beri jalpy jolaýshylar aǵyny 42 396 276 qurady. Kúnine orta eseppen olardyń sany – 403 600.