Astana avtobýstarynda jarnama berýge bolady
ASTANA. QazAqparat - Astana LRT avtobýstarda jarnama berý qyzmetin qosty. Bul týraly Astana LRT Basqarma tóraǵasy Bekmyrza Igenberdınov «Nur Otan» partııasynyń qalalyq fılıaly komıssııasynyń otyrysy kezinde aıtty, dep habarlaıdy QazAqparat tilshisi.
«Elordalyq avtobýs borttarynda jarnama ilinedi. Bul qosymsha tabys kózi, jarnama túsimi barlyq tabystyń jobamen 5\1 quraıtyn bolady jáne ol qoǵamdyq kóliktiń baǵasyna esh áserin tıgizbeıdi», -dedi Bekmyrza Igenberdınov.
«Biz sońǵy ýaqytta tasymaldaýshylar óz qyzmetteri arqyly múmkindiginshe kóbirek tabys tabýy úshin bıletsiz tabys boıynsha kelissózder júrgizip jatyrmyz. Sol arqyly tasymaldaýdan túsetin kiristi 15-20% ulǵaıtýdy kózdep otyrmyz. Árıne, ázirge bul az kórsetkish, biz bastapqy satysyndamyz. Jyldyń sońyna qaraı istelingen jumys nátıjesi boıynsha taldaý jasaımyz. Búginde jarnama qyzmetin ártúrli ýaqytqa alýda, bireýler bir aptaǵa, keıbireýler bir aıǵa», -dedi Basqarma basshysy.
Baǵa kórsetkishine sáıkes jarnama ilýge ataýly bes avtobýsqa deıin alýǵa bolady.
Sonymen qatar, B.Igenberdınov jańa saralanǵan (dıfferentsıaldy) tarıfti engizý arqyly kóleńkeli aınalymnan 15% tabysty alyp shyqqanyn aıtty.
«Biz qoǵamdyq kóliktiń jaǵdaıy men onyń qyzmet kórsetý sapasy týraly aı saıyn esep berip otyramyz. Búginde qala boıynsha jolaýshylardyń 90% kólik kartasyn paıdalanady. Bul jaqsy kórsetkish. Jaqyn ýaqytta bul kórsetkishti 95-98% ósirý jospary tur. Sonda bizge tasymaldaýshylardyń naqty tabys kólemin bilý múmkindigi týady. Sol arqyly qoǵamdyq kólik baǵasyna qatysty taldaý jasap, odan ári ne isteý kerektigin anyqtaıtyn bolamyz», -dedi ol.
